ئاگر ب بارەگەها ئه‌نه‌كه‌سێ یا عاموودێ کەت و سەرۆکێ ئه‌نه‌كه‌سێ: ئەڤ ئێریش ئیرادەیا مە ناشکینە
ئاگر ب بارەگەها ئەنجوومەنا نشتیمانی یا کوردی ل سووریەیێ (ئه‌نه‌كه‌سێ) یا ل باژارێ عاموودێ کەت. د ئەنجاما شەواتێ دە زەرەرەکە مەزن یا مادی چێبوو، لێ ت زیانێن جانی نەهاتن تۆمارکرن. سەدەما شەواتێ هەتا نها نەدیارە.
خوەجهیا عاموودێ یا ئه‌نه‌كه‌سێ ئیرۆ 25ێ ئیلۆنا 2025ێ بەلاڤ کر، ئیرۆ سەرێ سبێ دەمژمێر 07:30، دەما کو کارمەندێن نڤیسگەهێ دەری ڤەکرن، دیتن کو ئاگر ب بارەگەهێ کەتیە. د ئەنجاما شەواتێ دە، بەشەکە مەزن ژ کەلووپەل و ئاموورێن د ناڤ نڤیسگەهێ دە ب تەمامی شەوتین.
سەرۆکێ خوەجهیا عاموودێ یا ئه‌نه‌كه‌سێ دیار کر، هەتا نها سەدەما شەواتێ نەهاتیە زانین و دەربارێ بوویەرێ دە لێکۆلین ددۆمن.
شاندەیا ئه‌نه‌كه‌سێ سەردانا بارەگەهێ کر
پشتی بوویەرێ ب چەند دەمژمێران، شاندەیەکە پایەبلندا ئه‌نه‌كه‌سێ سەردانا بارەگەها شەوتی کر. د شاندەیێ دە سەرۆکێ ئەنکسێ محه‌مه‌د ئیسماعیل و سەرۆکێ نڤیسگەها کاروبارێن خوەجهیێن ئه‌نه‌كه‌سێ نەشئەت زازا جهـ گرتن.
سەرۆکێ ئه‌نه‌كه‌سێ محه‌مه‌د ئیسمعیل تەکەز کر، ئارمانجکرنا نڤیسگەهان نکارە ڤینا کارێ نشتمانی یێ ئه‌نه‌كه‌سێ و هێزێن سیاسی یێن د ناڤ دە، راوەستینە.
هەروها گۆت: “بەرەڤاژی، ئەڤ یەک رژدبوونا مە ل سەر دۆماندنا مەشا تێکۆشینێ د خزمەتا دۆزا گەلێ کورد و مافێن وییێن نەتەوەیی یێن رەوا دە زێدەتر دکە.”
ل سەر درێژاهیا سالێن بۆری، گەلەک جاران نڤیسگەهـ و بارەگەهێن ئه‌نه‌كه‌سێ ل ناڤچەیێن جودا یێن رۆژئاڤایێ کوردستانێ هاتن شەوتاندن و چالاکیێن وان هاتن قەدەغەکرن. بەرپرسێن ئه‌نه‌كه‌سێ ژی، گرووپێن چەکدارێن سەر ب په‌یه‌دێ ژ ڤان هەموو بنپێکرنان بەرپرسیار دبینن.
