ژ بەر نڤیسا کوردی یا ل سەر درێسی، سزا ب سەر ئامەدسپۆرێ ھات سەپاندن

فەدەراسیۆنا فوتبۆلێ یا ترکیەیێ (TFF)، ب ھنجەتا کو ل سەر فۆرمەیێن لیستکڤانان نڤیسێن کوردی ھەبوون، یانەیا ئامەدسپۆرێ ب 110 ھەزار لیرەیێن ترکی سزا دا. پارتیا وەکھەڤی و دەمۆکراسیێ یا گەلان (دەم پارتی) ل ھەمبەری ڤێ بریارێ بەرتەکەکا توند نیشان دا و ئەو وەکە بریارەکا “شەرمێ” ب ناڤ کر.

ئامەدسپۆرێ، د دیرۆکا ترکیەیێ دە جارا یەکەم، ژ بۆ سپۆنسەریا ل سەر سینگا فۆرمەیێن خوە لگەل کۆمپانیایەکا ئامەدی ل ھەڤ کربوو و ل بن لۆگۆیا کۆمپانیایێ ب کوردی “کۆما مە بۆنا وە” نڤیساندبوو. یانە ب ڤان فۆرمەیان دەرکەتبوو پێشبرکا ل ھەمبەری ساکاریاسپۆرێ. لێ فەدەراسیۆنا فوتبۆلێ یا ترکیەیێ ب ھنجەتا کو “پابەندی رێنمایێن جلووبەرگێن وەرزشی نەبوویە”، ئەڤ سزایێ پارەیان ل سەر ڤێ یانەیێ سەپاند.

سەرۆکێ ئامەدسپۆرێ بەرتەک نیشانی بریارێ دا و راگھاند، لۆگۆیێ ل سەر درێسی و نڤیسا ل سەر وی، بەرێ ھەم ژ ئالیێ وەزارەتا بازرگانیێ یا ترکیەیێ ڤە ھاتیە ئەرێکرن، ھەم ژی فەدەراسیۆنێ ب خوە ئەڤ یەک قەبوول کریە.

دەم پارتی: ئەڤ نێزیکاتی دبە سەدەما ئێرشێن نیژادپەرەست

ل ئالیێ دن، ھەڤسەرۆکێن گشتی یێن دەم پارتیێ تونجەر باکرھان و تولای ھاتیمۆغلاری ب داخویانیەکا ھەڤبەش رەخنەیێن توند ل فەدەراسیۆنا فوتبۆلێ یا ترکیەیێ گرتن. ھەڤسەرۆکان دیار کرن کو ئەڤ بریارە نیشانا تەحەمولنەکرنا زمانێ کوردییە و گۆتن: “ل پارلامەنتۆیێ کوردی قەبوول ناکن، د فوتبۆلێ دە سزا ددن. ئەڤ نێزیکاتی دبە سەدەما ئێرشێن نیژادپەرەست.”

باکرھان و ھاتیمۆغلاری بانگ ل فەدەراسیۆنێ کرن کو “گاڤەکێ زووتر دەست ژ ڤێ بریارا شەرمێ بەردن” و لێبۆرینێ بخوازن و وھا گۆتن: “ئەم ب چ ئاوایی ڤێ نەحەقی و ستەمێ قەبوول ناکن.”