سەرۆکوەزیر مەسروور بارزانی رەوشا تەندورستیا ئیسماعیل بەشکچی پرسی
سەرۆکێ حکوومەتا ھەرێما کوردستانێ رەوشا تەندورستی یا نڤیسکار و جڤاکناسێ ناڤدارێ ترک و دۆستێ گەلێ کورد در. ئیسماعیل بەشکچی پرسی و ئامادەبوونا خوە ژی ژ بۆ پێشکێشکرنا ھەر ئالیکاریەکێ نیشان دا.
حکوومەتا ھەرێما کوردستانێ د راگھاندنەکێ دە ئاماژە دا، “سەرۆکێ حکوومەتا ھەرێما کوردستانێ مەسروور بارزانی ئیرۆ (سێشەم، 3ێ خزیرانا 2025ێ) رەوشا تەندورستی یا نڤیسکار و جڤاکناسێ ناڤدارێ ترک و دۆستێ گەلێ کورد در. ئیسماعیل بەشکچی پرسی، کو نھا ل نەخوەشخانەیێیە.”
ل گۆری وێ راگھاندنێ، سەرۆکوەزیر مەسروور بارزانی د وێ پەیوەندیێ دە کو لگەل وەقفا بەشکچی ئاخڤی، داخوازا چارەبوونێ ژ بۆ بەشکچی کر و ئامادەبوونا خوە ژی ژ بۆ پێشکێشکرنا ھەر ئالیکاریەکێ ژ بۆ چارەکرنا وی نیشان دا.
در. ئیسماعیل بەشکچی شەڤێدی (شەمبیێ، 27ێ ئیلۆنا 2025ێ) تووشی نەخوەشیەکێ بوو و ژ بۆ نەخوەشخانەیا زانینگەھا دیجلەیێ یا باژارێ دییاربەکرێ یێ باکورێ کوردستانێ ھات ڤەگوھاستن.
ئیسماعیل بەشکچی ل رۆژا 7ی بەرچلەیا سالا 1939 ل گوندێ ئیسکلیپێ یێ گرێدایی پارێزگەھا چۆرومێ یا ترکیەیێ د ناڤ مالباتەکە ترک یا دیندار دە ھات سەر دنیایێ.
ئەو وەکی دۆست و پارێزڤانەکی گەلێ کورد تێ ناسین، ھەر ژ بەر ڤێ یەکێ ژی ئەو 17 سال و دو مەھان ل گەلەک گرتیگەھێن جودا جودایێن وەلاتێ خوە ھات گرتن و ل داویێ ل سالا 1974 ھات بەردان.
