په‌كه‌كێ مرنا ڤان گه‌ریلایان ژ سالا 2019ێ ڤه ڤه‌شارتبوو
ناسنامه‌یێن 6 جوانێن دن یێن كوردان ئاشكه‌ره بوو كو ژ سالا 2019ێ ڤه كه‌تنه به‌ر ئێریشێن ده‌وله‌تا ترك و رێخستنا په‌كه‌كێ مرنا وان ڤه‌شارتی هشتبوو، ژ هلوه‌شاندنا خوه ڤه، هه‌ر رۆژ تاوانه‌كا ووسا یا په‌كه‌كێ ئیفشا دبه.
هه‌په‌گێ باسكێ له‌شكه‌ری یێ په‌كه‌كێ ئیرۆ 29 ئیلۆنا 2025، ناسنامه‌یێن 6 چه‌كدارێن خوه ئاشكه‌ره كرنه كو ل سالا 2019ێ ل هه‌رێمێن زاپێ، ئاڤاشین و قه‌ندیلێ به‌رێ وان دایه مرنێ و هه‌یا رۆژا مه یا ئیرۆ مرنا وان ڤه‌شارتی هشتبوو.
ناڤێن وان وسایه:
رۆژبین موگدات ژ جۆله‌مێرگێ.
جه‌لیله داوود ژ ئامه‌دێ.
ئیسرا ئیبراهیم ژ مه‌له‌تیێ.
عه‌زیز سه‌عید ژ مانیسایێ.
فه‌رهاد ئیسماعیل ژ جۆله‌مێرگێ.
ردوان محه‌مه‌د ژ ئامه‌دێ.
په‌كه‌كێ د په‌سنێ ته‌ڤان ده گۆتیه ئه‌و ملیتانێن مه یێن ئاپۆیی بوون، خوه فه‌دایێ ئاپۆ كرن!.
په‌كه‌كه هه‌ر رۆژ وێنه‌یێن كۆمێن كه‌چ و جوانێن كوردان د مه‌دیایا خوه ده پارڤه‌دكه، جوانێن كو د سال و مه‌هێن به‌رێ ده داینه كوشتن و مرنا وان هه‌یا رۆژا مه یا ئیرۆ ڤه‌شارتی هشتی، ل گۆری ئاگاهیێن ده‌ستێ مه، هێژان ب هه‌زاران جوان ما نه كو ناسنامه‌یا وان ڤه‌شارتی مایه و په‌كه‌كێ مرنا وان ئیفشا نه‌كری یه.
