وەقفا ئیسماعیل بێشكچی: دەرمانکرنا مامۆستە دێ ل بەشا ئاسایی بدۆمە
دەربارێ رەوشا نڤیسکار و جڤاکناس ئیسماعیل بێشكچی دە هات راگهاندن، رەوشا وی بەر باشیێ ڤە دچە و تێ پێشبینیکرن کو رۆژێن پێش دە بۆ بەشا ئاسایی یا نەخوەشخانەیێ وەرە ڤەگوهەستن و دەرمانکرنا وی ل وێ دەرێ بدۆمە. هەر وها ل بەر ناخوەشخانەیا زانکۆیا دیجلەیێ خالەکە سەردانێ بۆ حەزکریێن ئیساعیل بێشكچی هاتیە دانین و کەسێن تێن سەردانێ ژی ل سەر دەفتەرا بیرئانینێ دەربارێ ئیسماعیل بێشكچی دە هەستێن خوە دنڤیسن.
ژ ئالیێ وەقفا ئیسماعیل بێشكچی ڤە دەربارێ رەوشا ئیسماعیل بێشكچی دە داخویانیەک هات پارڤەکرن و هات ئاماژەکرن رەوشا ئیسماعیل بێشكچی بەر ب باشیێ ڤە دچە، هێدی هێدی لاشە وی سەر خوە ڤە تێ، ئالیێ وی یێ راستێ کو گران ببو هێدی هێدی دیسا هێزا خوە کۆم دکە، ئاخافتنا وی بەر ب باشیێ ڤە دچە، تێ پێشبینیکرن کو دەمەکە نێز دە بۆ بەشا ئاسایی وەرە ڤەگوهاستن و دەرمانکرنا وی یا فیزیکی ل وێ دەرێ بەردەوام ببە و بۆ پێڤاژۆیا دەرمانکرنا فیزیکی ژی دڤێ بۆ وی پسپۆرەک نەخوەشنێریێ ئامادە بە.
ل ئالیێ دن ژی حەزکریێن ئیسماعیل بێشكچی ب ئاوایەکە بەردەوام سەردانا نەخوەشخانەیا زانکۆیا دیجلە دکن و ل رەوشا وی دپرسن.
ل خالا کو تایبەت بۆ سەردانا حەزکریێن ئیسماعیل بێشكچی هاتیە دروستکرن دەفتەرەک بیرئانینێ ژی هاتیە دانین و کەسێن تێن سەردانێ ژی ل سەر وێ دەفتەرێ نێرین و هەستێن خوە بۆ ئیسماعیل بێشكچی دنڤیسن.
وەقفا ئیسماعیل بێشكچی سپاسنامەیەک بۆ کەسێن پرسا ئیسماعیل بێشكچی کرنە ژی پارڤە کر:
دلێ گەلێ مە ب مامۆستەیێ وی رە لێددە!
پشتی کو مامۆستەیێ مەیێ عەزیز ئیسماعیل بێشكچی ل نەخوەشخانەیێ رازاندن د سەری دە رایا گشتی یا کورد، ب سەدان دۆست و حەزکریێن مامۆستە هەم هاتن نەخوەشخانەیێ هەم ژی ب ریێن راگهاندنێ یێن دن خوە گهاندن رایەدارێن وەقفا مە و خەمگینیا خوە ئانین زمان و هێڤییێن خوە یێ هەڤکاری و پشتگریێ راگهاندن.
د سەری دە سەرۆکوەزیرێ کوردستانێ مەسروور بارزانی، سەرۆکێ کوردستانێ نێچیرڤان بارزانی و رایەدارێن حکوومەتا کوردستانێ،
سەرۆکێ گشتییێ دەم پارتیێ تونجەر باکرهان، سەرۆکێ گشتییێ به‌ده‌پێ کەسیکن بایندر، سەرۆکێ گشتییێ په‌سه‌كێ بایرام بۆزیەل، سەرۆکێ گشتییێ كه‌كه‌پێ سنان چفتیۊرەک، په‌ده‌كه-باکور سەرتاچ بوجاک، بەردەڤکا هه‌ده‌كێ مەرال دانش بەشتاش،
شاندیێ جه‌هه‌پێ سەزگین تانرکولو، شاندیێن دەم پارتیێ جەنگیز چاندار و سەرهات ئەرەن، هەڤسەرۆکێن شارەداریا باژارێ مەزن یا ئامەدێ سەڕا بوجاک و دۆغئان هاتون، گەلەک هەڤشارەدارێن ناڤچەیێن ئامەدێ، رایەدار و ئەندامێن هاکپار و پارتیا وه‌لاتپارێزێن كوردستانێ؛ رەوشەنبیر، نڤیسکار و هونەرمەندێن کورد؛ د سەری دە ئۆدەیا تابیبانا ئامەدێ و سازی و دەزگەهێن سڤیلیێن ئامەدێ؛ ئەکیبا تەندورستیێ یا کو تەداویا مامۆستە دکە و گەلەک هەکیمێن دن یێن بیزات هاتن ب مامۆستە رە ئەلەقەدار بوون و گەلێن ژ دەڤەرێن دوور گەریان گۆتن ئەم ئامادەنە ژ بۆ مامۆستە ببن ئالیکار؛ ب سەدان ئەندام و نوونەرێن پارتی، سازیێن سڤیلێن جڤاکی و حەزکریێن مامۆستە ئیسماعیل بێشکچی کو ل ڤر نە ممکونە ئەم ناڤێن وان رێز بکن هاتن بەر نەخوەشخانەیێ، هێڤیێن خوەیێن ژ بۆ باشبوونا مامۆستە و حەزکرنا خوە ئانین زمان…
د سەری دە ئەورۆپا، ل چار هێلێن دنیایێ حەزکریێن مامۆستە دگەرن و رەوشا وی دپرسن. هەر وسا ل سەر مەدیا جڤاکی ب هەزاران دۆستێن مامۆستە هەست و حەزکرنا خوە پارڤە دکن.
داوی نوونەرێ وەقفا مەیێ ئامەدێ نەزیرێ جبۆ و خەباتکارێن وەقفا مە چ کەت سەر ملێ وان پێک ئانین.
وەک سەرۆک و رێڤەبەریا وەقفا ئیسماعیل بێشكچی ئەم ژ هەموویان رە سپاسیێن خوە پێشکێش دکن. ئەم د ڤێ باوەریێ دەنە ب سایا دوعا و هێڤیێن مە گشانێن ژدل، مامۆستەیێ مە وێ دیسا بگه‌هه تەندورستیا خوە یا بەرێ و وێ جارەکە دن ب مە رە بە.
