وەزارەتا پێشمەرگە و هێزێن ئامەریکایێ پێنگاڤێن یەککرنا هێزێن پێشمەرگەیان نیقاش کرن
وەزارەتا پێشمەرگە یا حکوومەتا هەرێما کوردستانێ ب هێزێن ئامەریکایێ و هێزێن هەڤپەیمانیا ناڤنەتەوەیی رە ل سەر پێنگاڤێن یەککرنا هێزێن پێشمەرگەیان نیقاش کرن.
ل گۆری راگهاندنەکێ کو ژ ئالیێ وەزارەتا پێشمەرگە ڤە هاتیە وەشاندن، سەرۆکێ ئەرکانێن وەزارەتا پێشمەرگە فەریق روکن عیسا ئوزەر ئیرۆ (سێشەم، 30ێ ئیلۆنا 2025ێ) ب سەرۆکێ نڤیسگەها هەڤکاریا ئەولەهیێ یا کۆنسولخانەیا گشتی یا ئامەریکایێ ل هەولێرێ کۆلۆنەل دێک پایلویک رە جڤیا.
ل گۆری وێ راگهاندنێ، د وێ جڤینێ دە بزاڤێن داویێیێن وەزارەتا پێشمەرگە د پێڤاژۆیا دوبارە یەککرنا یەکینە و هێزێن جودایێن پێشمەرگەیان دە و نرخاندنا چاوانیا برێڤەبرنا پێڤاژۆیا یەککرنێ هاتن نیقاشکرن.
هەر ل گۆری وێ چاڤکانیێ، وان بال کێشا سەر قۆناغێن پێکئانینا یاداشتنامەیا هەڤفێمکرنێ یا د ناڤبەرا وەزارەتا پێشمەرگە و وەزارەتا پاراستنێ یا ئامەریکایێ دە ژی. هەروەسا هەردو ئالی ل سەر بجیهانینا بەند و خالێن د ناڤ وێ کارنامەیێ دە هەڤنەرین بوون.
وەزارەتا پێشمەرگە هەروەسا راگهاند، فەریق روکن ئیسا ئوزەر د وێ جڤینێ دە تەکەز ل سەر وێ یەکێ ژی کر کو، ئەو پابەندی پێڤاژۆیا چاکسازیێ و رێخستنا هێزێن پێشمەرگەیانن و دێ بەردەوام بن هەتا کو وێ پێڤاژۆیێ ب تەمامی دگهینن ئەنجامێ.
وەزارەتا پێشمەرگە ئەشکەرە ژی کر، فەریق روکن ئیسا ئوزەر و کۆلۆنەل دێک پایلویک ل سەر زێدەتر هەڤاهەنگی و گرینگیدانا ب تێکلیێن د ناڤبەرا وەزارەتا پێشمەرگە و هێزێن ئامەریکایێ و هێزێن هەڤپەیمانیا ناڤنەتەوەیی دە ل هەرێما کوردستانێ ل هەڤ کر، ژ بۆ تەمامکرنا تەڤایا وێ پێڤاژۆیا کو وەزارەتا پێشمەرگە ب پشتەڤانیا تەماما هکوومەتا هەرێما کوردستانێ دمەشینە.
