کورتولموش ل سەر ھەڤدیتنا کۆمیسیۆنێ و ئۆجالان و دانپێدانا ب زمانێ کوردی بەرسڤا پەکەکێ ددە
سەرۆکێ پارلەمەنتۆیا ترکیەیێ تەکید کر، “ھەتا کو پەکەکە و شاخێن وێ چەکان نەدەینن، ئەم رەفۆرما قانوونی ناکن.” تەکەز ژی کر، “ژ بلی زمانێ ترکی، ئەم چ زمانەکی دن وەکی زمانێ فەرمی قەبوول ناکن.”
سەرۆکێ پارلامەنتۆیا ترکیەیێ نومان کورتولموش ل سەر پێڤاژۆیا نوو یا ئاشتیێ ئاخڤی و راگھاند، “قۆناغا قانوونی یا پێڤاژۆیا ئاشتیێ وێ دەمێ دەست پێ دکە کو، پارتیا کارکەرێن کوردستانێ (پەکەکە) ب ھەمی پێکھاتەیێن وێ ڤە، تەڤی یێن کو ل سووریەیێ نە ژی، چەکێن خوە دەینن. د دوو رە ئەم دێ ھندەک رەفۆرمێن قانوونی یێن تایبەت یێن پێڤاژۆیێ بدن دەستپێکرن.”
کورتولموش ئاماژە ژی دا، “پشتی کو پەکەکە ب تەڤاھی ھلوەشیا، ئەم دێ رێکخستنا قانوونی ژ بۆ وان ئەندامان بکن یێن کو دەستێن وان د ناڤ تاوانان دە نینن. لێ رەوشا کەسێن کو دەستێن وان د ناڤ تاوانان دە نە، دێ پیچەک ئالۆزتر بە.”
ناڤبری رۆن ژی کر، “رێبەرێ پەکەکێ یێ گرتی عەبدوللا ئۆجالان ب رێیا شاندەکا پارتیا وەکھەڤی و دەمۆکراسیێ یا گەلان (دەم) و پارێزەرێن خوە نێرینێن خوە پێشکێش دکە، لێ ھین ژی جڤینا کۆمیسیۆنا پارلەمەنتۆیێ ب وی رە د بەرنامەیێ دە نینە. گەر ئەو بکەڤە ناڤ بەرنامەیێ ژی، دڤێت ژ ھێلا پرانیا ئەندامێن کۆمیسیۆنێ ڤە بێ پەژراندن، ھنگێ ئەو دکارن لگەل ئۆجالان بجڤن.”
سەرۆکێ پارلامەنتۆیا ترکیەیێ تەکەز ژی کر کو، ھەتا نە ممکوونە کو ل سەر قەبوولکرنا زمانەکی وەکی زمانێ فەرمی ژ بلی زمانێ ترکی نیقاش بێ کرن و ئەو پێڤاژۆ چ مژارا فەرمیکرنا زمانەکی دن ل ترکیەیێ ڤەناگرە.
وەرزێ نوویێ دانانا قانوونانان ل پارلەمەنتۆیا ترکیەیێ ئیرۆ چارشەمبێ، 1ێ جۆتمەھا 2025ێ، پشتی دەربازبوونا دو مەھان ژ بێھنڤەدانا وێ دەست پێ دکە. ھەروەسا پێڤاژۆیا ئاشتیێ ل وی وەلاتی ژی ئیرۆ سالەک دەرباز کر.
