زانینگەها دیجلە داخویانییەک ل سەر رەوشا ئیسماعیل بێشكچی پارڤە کر
سەرۆکپزیشکێ نەخوەشخانەیا زانینگەها دیجلەیێ داخویانییەک ل سەر رەوشا تەندورستیا ئیسماعیل بێشكچی پارڤە کر و تێ دە ئەشکەرە کر کو رەوشا وی نها باشە.
سەرۆکپزیشکێ نەخوەشخانەیا زانینگەها دیجلەیێ پرۆف. در. مەهمەت ئاتا ئاکل دوهـ (چارشەم، 1ێ جۆتمەها 2025ێ) داخویانییەکە نڤیسکی ل سەر رەوشا تەندورستیا ئیسماعیل بێشكچی پارڤە کر و تێ دە وها گۆت:
تەندورستیا سۆسیۆلۆگ و نڤیسکار ئیسماعیل بێشکچی
نەخوەشێ مە پشتی دەرمانکرنا د بەشا لێنێرینا گران دە ل بەشێ نەخوەشخانەیێ هاتیە رازاندن. ئەو هشیارە، ستابیلە، و تەندورستیا وی یا گشتی رۆژ ب رۆژ باشتر دبە.
نەخوەشخانەیا زانینگەها دیجلەیێ دەرمانکرنا برێز ئیسماعیل بێشکچی ب بالداری دشۆپینە.
ب رێزداری ژ رایا گشتی رە تێ راگهاندن.
در. ئیسماعیل بێشكچی ل رۆژا شەمیێ (27ێ ئیلۆنا 2025ێ) ب شەڤ تووشی نەخوەشیەکێ بوو و ژ بۆ نەخوەشخانەیا زانینگەها دیجلەیێ یا باژارێ دیاربەکرێ یێ باکورێ کوردستانێ هات ڤەگوهاستن.
ئیسماعیل بێشكچی ل رۆژا 7ێ بەرچلەیا سالا 1939ێ ل گوندێ ئیسکلپێ یێ گرێدایی پارێزگەها چۆرومێ یا ترکیەیێ د ناڤ مالباتەکە ترکا دیندار دە هات سەر دنیایێ.
ئەو وەکی دۆست و پارێزڤانەکی گەلێ کورد تێ ناسین، هەر ژ بەر ڤێ یەکێ ژی ئەو 17 سال و دو مەهان ل گەلەک گرتیگەهێن جودا جودایێن وەلاتێ خوە هات گرتن و ل داویێ ل سالا 1974ێ هات بەردان.
