هەلبەستڤانا کورد مزگین حەسکۆ کۆچا داوی کر

هەلبەستڤانا کورد یا ناسکری مزگین حەسکۆ، کو یەک ژ دەنگێن هەری بەربچاڤێن هەلبەستا نووژەن یا کوردی ل دیاسپۆرایێ بوو، کۆچا داویێ کر.

هەلبەستڤان مزگین حەسکۆ کو ئەڤ زێدەتری سێ سالان بوو ل دژی نەخوەشیا پەنجەشێرێ تێدکۆشیا، شەڤا بۆری ل باژارێ بەلەفەلدێ یێ ئالمانیایێ، ژ بەر نەخوەشیێ د 52 سالیا خوە دە، کۆچا داویێ کر.

مزگین حەسکۆ د سالا 1973ان دە ل گوندێ شلهۆمیێ یێ تربەسپیێ ل رۆژئاڤایێ کوردستانێ ژ دایک ببوو، ژ سالا 1992ان ڤە ل ئالمانیایێ دژیا و دایکا سێ زارۆکان بوو.

حەسکۆ د ناڤ جڤاتا کورد یا ل دیاسپۆرایێ دە هەلبەستڤانەکە چالاک بوو، ب بەردەوامی بەشداری فه‌ستیڤال و چالاکیێن وێژەیی دبوو و هەتا داویا ژیانا خوە 14 دیوان پێشکێشی پرتووکخانەیا کوردی کرن.

ژ بەر کەدا وێ یا گرانبوها د وارێ وێژەیا کوردی دە، مزگین حەسکۆ د سالا 2022ان دە هێژایی خەلاتا سەیدایێ تیرێژ هاتبوو دیتن. کۆچا وێ یا داوی د ناڤ وێژەحەز و رەوشەنبیرێن کورد دە بوو سەدەما خەمگینیەکە مەزن.