پاسداران گوللـە ل کۆلبەران رەشاندن: رێبوارێ 38 سالی هات کوشتن
هێزێن ئەولەهیێ یێن ئیرانێ ل هەرێمێن سینۆری یێن بانەیێ گوللـە ل کۆلبەران رەشاندن و د ئەنجامێ دە کۆلبەرەکی ب ناڤێ رێبوار محەمەدزادە جانێ خوە ژ دەست دا.
رێبوار محەمەدزادەیێ 38 سالی، زەوجی بوو و باڤێ 2 زارۆکان بوو و ژ گوندێ سیپیدارێ یێ باژارێ بانەیێ یێ رۆژهلاتێ کوردستانێ بوو.
کۆلبەرەکی کو ب رێبوار محەمەدزادە رە بوویە ژ رێخستنێن مافێن مرۆڤان یێن رۆژهلاتێ کوردستانێ رە گۆتیە کو هێزێن ئیرانێ بێیی هشیاریەکە پێشوەخت گوللـە ل وان رەشاندنە.
بوویەر ل سینۆرێ سوور کێوێ یێ بانەیێ قەومیە و تەرمێ رێبوار محەمەدزادە ژ بۆ نەخوەشخانەیا سەلاحەدینێ ئەیووبی یا ل بانەیێ هاتیە ڤەگوهەستن.
هێزێن ئیرانێ 25ێ ئیلۆنا 2025ان ژی ل هەرێمێن سینۆری یێن بانەیێ گوللـە ل هەژمارەک کۆلبەران رەشاندبوون و د ئەنجامێ دە کۆلبەرەکی ب ناڤێ قاسم عەزیزی جانێ خوە ژ دەست دابوو.
ل گۆری ئامارێن کۆلبەر نیۆزێ، د 6 مەهێن ئەول یێن سالا 2025ان دە هەری کێم 30 کۆلبەر ل ئورمیە، سنە و کرماشانێ هاتنە کوشتن کو 13 ژ وان ب گوللـەیێن هێزێن ئیرانێ بوونە.
