ئۆجالان: پێشکەتنا پێڤاژۆیێ ب پێدڤیێن سیاسی و یاسایی ڤە گرێداییە

شاندەیا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی)، دەربارێ ناڤەرۆکا ھەڤدیتنا خوە یا لگەل رێبەرێ پەکەکێ عەبدوللاھ ئۆجالان داخویانیەک دا. د داخویانیێ دە ھات راگھاندن کو ئۆجالان جارەکا دن تەکەزی ل سەر گرێدانا پێڤاژۆیا چارەسەریێ ب پێکانینا پیڤانێن سیاسی و حقووقی کریە.

د داخویانیا کو ئیرۆ، 4ێ جۆتمەھا 2025ێ ھات وەشاندن دە، ھات دیارکرن کو شاندەیێ رۆژا 3 جۆتمەھێ ل گرتیگەھا ئیمرالیێ ھەڤدیتنەکا کو نێزیکی سێ دەمژمێر و نیڤان بەردەوام بووی، لگەل عەبدوللاھ ئۆجالان پێک ئانیە.  

د داخویانیێ دە ھات گۆتن، ئۆجالان بال کشاندیە سەر رەوشا بێپەڤچوون یا سالەکێ یا د چارچۆڤەیا “پێڤاژۆیا ئاشتی و جڤاکا دەمۆکراتیک” دە و دەستنیشان کریە کو ب سایا ڤێ پێڤاژۆیێ رێ ل بەر مەترسیێن مەزن ھاتیە گرتن و کەدا ھەر کەسێ کو د ڤێ یەکێ دە رۆل لیستیە، ب روومەتە.

پێشنیارا “دەمۆکراسیا دانوستاندنێ”

ل گۆری داخویانیێ، ئۆجالان پێشنیارا “دەمۆکراسیا دانوستاندنێ” وەکی مۆدەلەکا چارەسەریێ یا گرینگ ب ناڤ کریە و گۆتیە: “یەک ژ مۆدەلێن چارەسەریێ یێن گرینگ کو شارستانیێ پشتی سێ سەد سالێن پەڤچوونێن وێرانکەر و ونداھیێن مەزن یێن د شەرێن جیھانێ دە پێش خستیە، دەمۆکراسیا دانوستاندنێ یە. دڤێت رێباز و مەکانیزمایێن کو بنگەھا ڤێ یەکێ پێک تینن، ژ بۆ چارەسەرکرنا گەلەک پرسگرێکێن ترکیەیێ یێن ناڤخوەیی و دەرڤە وەکە ئەساس وەرن گرتن.”

“پێدڤیێن حقووقی دڤێت بهێن پێکانین”

ئۆجالان ئاماژە ب وێ کر کو ئەو ل سەر ھەلوەستا خوە یا د داخویانیا 27ێ سباتێ دە دسەکنن و وھا گۆتیە: “ئەم ل پشت وێ ھەڤۆکا خوە نە کو مە د داخویانیا 27ێ سباتێ دە ئانیبوو زمان و گۆتبوو ‘پێشکەتنا پێڤاژۆیێ ب پێدڤیێن سیاسی و حقووقی ڤە گرێدایی یە’.” ھەروھا تەکەز کریە کو د قۆناغا ھەیی دە، دەستنیشانکرن و پێکانینا پێدڤیێن حقووقی ب نێرینەکا راست و گشتگر، گەلەکی گرینگە.

د داویا داخویانیێ دە ھات راگھاندن، ئۆجالان دیار کریە کو دڤێت سەدسالا نوو یا کۆمارێ ل سەر بنگەھا حقووقا ئاشتی و دەمۆکراسیێ وەرە ئاڤاکرن.