ھەسەدێ 3 ئێریشێن ھێزێن حکوومەتێ تێک برن
ھێزێن سووریەیا دەمۆکراتیک (ھەسەدێ) راگھاند، شەرڤانێن وان ل ھەرێما دێر حافرێ یا گوندەوارێ رۆژھلاتێ حەلەبێ، 3 ھەولدانێن دەرباسبوونێ یێن کۆمێن گرێدایی حکوومەتا ڤەگوھێز یا سووریەیێ تێک برنە و ئامادە نە بەرسڤا ھەر ئێرشەکێ بدن. ئەڤ پێشھاتە د دەمەکێ دە تێ کو ئالۆزی ل وێ ھەرێمێ زێدە دبە و ھەسەدێ ھێزەکا زێدە شاندیە ئەنیێن شەر.
مەدیایا نێزیکی ھەسەدێ ل سەر زارێ شەرڤانەکی بەلاڤ کر، کۆمێن گرێدایی حکوومەتا شامێ ل گوندێ رەسم ئەل کرۆم 3 جاران ھەول دا دەرباس ببن. لێ ھێزێن وان ئامادە بوون و بەرسڤا وان دا.”
دەستنیشان کر ژی، کۆمێن ئێرشکار پشتا خوە ددن درۆنێن خوەکوژ و گەلەک جاران خالێن ھەسەدێ بۆمبەباران کرنە، لێ د وان ئێرشان دە چ شەرڤانەک بریندار نەبوویە. لێبەلێ، وی ھشیاری دا کو ئارمانجگرتنا سڤیلێن ل دێر حافرێ خەتەریێ زێدەتر دکە.
ئەڤ ئالۆزی و پەڤچوون پشتی کۆمکوژیەکێ پێک تێن کو مەدیایا سەر ب رێڤەبەریا خوەسەر ڤە بەلاڤ کر، د شەڤا 20ێ ئیلۆنا 2025ێ دە، درۆنێن حکوومەتا ڤەگوھێز ئێرشی سڤیلێن گوندێ ئوما تینایێ دێر حافرێ کربوون و د ئەنجامێ دە 8 سڤیل شەھید بووبوون و 3 ژی بریندار بووبوون.
ل ھەمبەری زێدەبوونا گەفان، ئێڤارا رۆژا ئینێ، ھێزێن سووریەیا دەمۆکراتیک ھەژمارەکا مەزن یا شەرڤان، وەساییتێن زرخی و ئالاڤێن سەربازی ژ دێرەزۆر و حەسەکێ ڤەگوھەستن ھەرێما دێر حافرێ دا کو ئەنیێن خوە بھێز بکن.
ئالۆزی نە تەنێ ل ئەنیێن شەرە. حکوومەتا ڤەگوھێز یا سووریەیێ دۆرپێچا ل سەر تاخێن شێخ مەقسوود و ئەشرەفیێ یێن ل حەلەبێ توندتر دکە. پشتی گرتنا رێیێن ئەل یەرمووک و ئەل جەندۆل ب بەندێن ژ ئاخێ، دوھ ئێڤارێ رێیا نێزی “نادیا ئەل-جەلا” ژی ھاتە گرتن و ب ڤێ یەکێ چوونووھاتن ژ ڤان تاخان ب تەمامی ھاتە قوتکرن.
گرتنا ڤان رێیان پەیمانا کو د 1ێ نیسانێ دە د ناڤبەرا مەجلیسا گشتی یا تاخێن شێخ مەقسوود و ئەشرەفیێ و نوونەرێن حکوومەتێ دە ھاتبوو ئیمزەکرن، بنپێ دکە. ل گۆری پەیمانێ، دڤیابوو ل سەر 7 رێیێن سەرەکی یێن دچن تاخان، خالێن کۆنترۆلێ یێن ھەڤبەش وەرن دانین، لێ نھا ئەو کارێ ھەڤبەش ژی ژ بەر گرتنا رێیان راوەستیایە.
د ڤێ ناڤبەرێ دە، ھێزێن ئەولەکاریا ھوندرین (ئاساییش) ل باژارێ حەلەبێ، ب داخویانیەکێ ئەو نووچەیێن کو ل سەر ھندەک تۆرێن جڤاکی بەلاڤ بووبوون و دگۆتن کو ھێزێن وان ئێرشی وەساییتەکا حکوومەتێ ل دەردۆرا تاخا ئەشرەفیێ کرنە، دەرەواند و بانگ ل وەلاتیان کر کو تەنێ خوە بسپێرن داخویانیێن فەرمی.
