شاسوار عەبدلواحد ئیرۆ تێ دادگەھکرن و ملکێن وی ژی تێن فرۆتن
ل گۆری زانیاران، نێزیکی 60 ملکێن د ناڤ پرۆژەیا گەشتیاریێ یا چاڤی لاندێ دە ل باژارێ سلێمانیێ ئیرۆ د مەزادەکا ئەشکەرە دە تێن فرۆتن و سەرۆکێ تەڤگەرا نفشێ نوو ژی تێ دادگەھکرن.
پێڤاژۆیا فرۆتنا ملکێن شاسوار دێ ئیرۆ رۆژا یەکشەمبێ، 5ێ جۆتمەھا 2025ێ ژ ھێلا فەرمانگەھا برێڤەبرنێ یا سلێمانیێ ڤە و د بن چاڤدێریا وەزارەتا دارایی و ئابۆری یا حکوومەتا ھەرێما کوردستانێ دە بێ مەشاندن.
ئەڤ پێنگاڤ پشتی وێ یەکێ تێ کو، وەزارەتا دارایی و ئابۆری بەری نھا راگھاندبوو کو خوەدیێ شیرکەتا چاڤیلاند و سەرۆکێ تەڤگەرا نفشێ نوو شاسوار عەبدلواحد گەلەک دەیندارێ حکوومەتێیە.
ئارمانج ژ فرۆتنا ڤان ملکان ئەوە کو، دەینێن کو ل سەر وێ شیرکەتێ کۆم بوونە، کو ب قاسی 90 ملیار دیناران تێن تەخمینکرن، بێن ڤەگەراندن. پارەک ژ ڤان دەینان د دەستپێکێ دە وەکی پێشینەیێن وەبەرھێنانێ ژ حکوومەتێ ھاتبوو گرتن، لێ ژ بەر نەدایینا دەینێن خزمەتکاریێن وەکی ئەلەکتریک، ئاڤ و باجان میقدارا وێ زێدە بوویە.
ھەروەسا سەرۆکێ تەڤگەرا نفشێ نوو شاسوار عەبدلواحد ئیرۆ ل سەر گلیێن چەند رۆژنامەڤانان جارەکا دن تێ دادگەھکرن. ئەڤ ژی پشتی کو د ھەفتیا بۆری دە ژ بۆ دادگەھێ ھات ڤەگوھاستن لێ دادوەری بریارا خوە ژ بۆ ئیرۆ پاشخست.
