سەرۆکێ حكوومه‌تا هەرێما کوردستانێ تەڤلی «تێدێكس نشتیمان»ێ بوو و راگهاند، «هەمی ئالیان دژایه‌تیا مە کر لێ مە د گەلەک واران دە سەرکەفتنێن مەزن ب دەست خستن.» هەروەسا گۆت، «نها کوردستان گهیشتیە ئاستەکێ و ئەم هێڤی دکن کو، کوردستانێ ژ بۆ ناڤخوە و تەڤاهیا دەڤەرێ ژی بکن چاڤکانیەکە خوارنێ».
ب ئامادەبوونا سەرۆکێ حكوومه‌تا هەرێما کوردستانێ مەسروور بارزانی، چالاکیا هەشتێ یا «تێدێكس نشتیمان»ێ ئیرۆ (یەکشەم، 5ێ جۆتمەها 2025ێ) ل هەولێرێ تێ لدارخستن.
مەسروور بارزانی ئاماژە ژی دا، «هەمی ئالیان بزاڤ کر کو، مە پاشڤە ببن، مە بێهێڤی بکن، مە بێئۆمێد بکن کو ئەم نکارن وەلاتێ خوە بەر ب پێش ڤە ببن. وان ژ مە رە ئاستەنگی چێ کرن، گەلەک دژواری ژ مە رە چێ کرن، رێ ل بەر مە گرتن، بودجەیا مە قوت کر، ژ مە رە پرسگرێکێن سیاسی چێ کرن، ژ مە رە پرسگرێکێن ئەولەهیێ چێ کرن.»
سەرۆکێ حكوومه‌تا هەرێما کوردستانێ تەکەز ژی کر، «ب خوەراگریا ڤی گەلێ خوەشتڤی و ب بێهنفرەهیا هەمی وەلاتیێن رێزدار، مە کاری رووبروویی وان هەمی زەحمەتیان ببن؛ نە تەنێ ڤان کریزان یەک ل دوو یەکێ نەهێلن، ئەم پێنگاڤان بەر ب پاشەرۆژەکە گەشتر ڤە باڤێژن و د گەلەک واران دە سەرکەفتنێن مەزن ب دەست بخن.»
سەرۆکێ حكوومه‌تا هەرێما کوردستانێ ئاماژە ژی دا، «یەک ژ وان تشتێن کو مە کاری سەرکەفتنەکە مەزن تێ دە بینن ئەو بوو کو، ئەم بالێ بکشینن سەر پڕەنگکرنا ئابۆریا کوردستانێ و چاڤێ مەنە تەنێ ل ئەنەرژی، پەترۆل و گازێ بە.»
سەرۆکوەزیر مەسروور بارزانی ئەشکەرە ژی کر، «مە تشتەکێ وەسا کر کو، جۆتکارێن مە ڤەگەرن ئەردێن خوە و هلبەرینا ناڤخوەیی یا کوردستانێ بگهینن ئاستەکێ کو ئەم نەتەنێ د هوندورێ هەرێما کوردستانێ دە فەیدەیی ژێ وەربگرن، لێ ژ بۆ دەرڤەیی هەرێما کوردستانێ ژی هناردە بکن.»
مەسروور بارزانی هەروەسا گۆت، «ژ بۆ جارا یەکێ بەرهەمێن ناڤخوەیی یێن هەرێما کوردستانێ ژ بۆ دەرڤەیێ کوردستانێ هات هناردەکرن و ئەڤ پێڤاژۆ بەردەوامە ژی. ئەڤ چاڤکانیا سەربلندیێ یە، چاڤکانیا شانازیێ یە.
سەرۆکوەزیر مەسروور بارزانی تەکەز ژی کر، «گەر باوەریا جۆتکارێن مە ب خوە نەبوویا، گەر باوەریا ڤی گەلی ب خوە نەبوویا، بێگومان ئەم دێ هین ژی ل پاش مابان و چاڤێ دێ هەر ل وێ یەکێ با کو خەلکی نان دابا مە.»
سەرۆکێ حكوومه‌تا هەرێما کوردستانێ هەروەسا راگهاند، «نها کوردستان گهیشتیە ئاستەک و ئەم هێڤی دکن کو گەلەک ژ وێ زێدەتر ژی بکن، کو کوردستانێ نە تەنێ ژ بۆ ناڤخوە لێ ژ بۆ تەڤاهیا دەڤەرێ ژی بکن چاڤکانیەکە خوارنێ.»
