سەرۆک بارزانی پێشوازیا ھەژمارەکا جوانێن کورد یێن دیاسپۆرایا کوردستانێ کر و ژ وان خوەست کو، گرینگیێ بدن خوەندن و خوەئاڤاکرنێ.
سەرۆک مەسعوود بارزانی دوھی رۆژا یەکشەمبێ، 5ێ جۆتمەھا 2025ێ، ل پیرمامێ پێشوازیا 110 جوانێن پارچەیێن کوردستانێ یێن دیاسپۆرایێ کر، کو د ناڤ وان دە 12 جوانێن وەلاتێن ئەورۆپایێ ژی ھەبوون.
ل گۆری راگھاندنا بارەگایێ بازرگانی، ل دەستپێکا وێ جڤینێ سەرۆکێ کۆنفەدەراسیۆنا دیاسپۆرایا کوردستانی ئیسماعیل کامل سپاسیا سەرۆک بارزانی کر، ژ بۆ پشتگریا بزاڤا کۆمکرنا کوردستانیێن دیاسپۆرایێ د بن سیوانەکا نەتەوەیی ڤە ژ بۆ پاراستنا ناسنامەیا وان یا نەتەوەیی.
پاشی سەرۆکێ فەدەراسیۆنا جوانێن رەڤەندا کوردستانی یاد ئەمین سپاسیا پشتگریا سەرۆک بارزانی کر و کورتیەک ل سەر دامەزراندنا فەدەراسیۆنا جوانێن رەڤەندا کوردستانی و رێکخستنا ڤێ گەشتێ ژ وی رە پێشکێش کر، ھەروەسا بال کشاند سەر ئارمانجێن نێزیک و دوورێن ڤێ بەرنامەیێ.
پشترە سەرۆک بارزانی بەحسا گرینگیا کۆمکرنا کوردستانیێن دیاسپۆرایێ د بن سیوانەکا نەتەوەیی دە ژ بۆ پاراستنا چاند، زمان و ناسنامەیا نەتەوەیی یا کوردستانێ و پشتگریا دۆزا رەوایا کوردستانێ کر.
سەرۆک بارزانی تەکەز ژی کر کو، دڤێت جوانێن کوردێن ل دەرڤەیی وەلاتی د ئۆرگان و دەزگەھێن ئەورۆپایی دە خوەدی جھ و گرانیەک بن و گرینگیێ بدن خوەندن و خوەئاڤاکرنێ، و ھەروەسا د ناڤبەرا دیاسپۆرایێ و وەلاتی دە ببن پرەکە موکۆم و لۆبیەکە بھێز د وارێن دیپلۆماتیک، سیاسی و چاندی دە ژ بۆ کوردستانێ چێ بکن.
د پارەکا دن یا وێ جڤینێ دە، سەرۆک بارزانی بەحسا رەوشا پارچەیێن دن یێن کوردستانێ کر و تەکەز ل سەر پشتگریا ھەرێما کوردستانێ ژ بۆ چارەسەریا ئاشتیانە یا دۆزا رەوایا کوردستانێ ل پارچەیێن دن یێن کوردستانێ کر.
