حکوومەتا ترکیێ دەما راوەستاندنا گەشتێن ئاسمانی یێن بالەفرگەھا ناڤنەتەوەیی یا سلێمانیێ ژ بۆ سێ مەھێن دن درێژ کر.
بالەفرگەھا ناڤنەتەوەیی یا سلێمانیێ ئیرۆ 6/10/2025ێ د راگھاندنەکێ دە ئەشکەرە کر، “دەستھلاتا بالافرڤانیێ یا شارستانی یا ترکیێ بریار دا کو، دەما راوەستاندنا گەشتێن ئاسمانی یێن ژ بۆ بالەفرگەھا ناڤنەتەوەیی یا سلێمانیێ ھەتا 6ێ چلەیا 2026ێ درێژ بکە.”
د وێ راگەھاندنێ دە ئاماژە ژی ھاتیە دان، “ل گۆری نامەیەکێ ھایداریێ، کو ژ ئالیێ دەستھلاتا بالافرڤانیێ یا شارستانی یا ترکیێ ڤە ھاتیە دەرخستن، ئاسمانێ وی وەلاتی ژ بۆ ھەمی گەشتێن کو ژ بالەفرگەھا سلێمانیێ تێن کرن یان ژی دخوازن ل وێ بالافرخانەیێ دادن تێ گرتن.
ئەڤ راوەستاندن ل رۆژا 3ێ نیسانا 2023ێ ھاتیە دەستپێکرن و ژ وێ دەمێ ڤە گەلەک جاران ھاتیە درێژکرن. حکوومەتا ترکیێ ئەڤ بریار ب نیگەرانیێن ئەولەھیێ ڤە گرێ دایە.
بریارا ترکیێ نە تەنێ گەشتێن ئاسمانی یێن راستەراست د ناڤبەرا سلێمانیێ و باژارێن ترکیێ دە راوەستاندنە، لێ باندۆر ل سەر وان گەشتان ژی ھەیەیێن کو ئاسمانێ ترکیێ وەکی رێیا ڤەگوھەرتنێ ب کار تینن دا کو بگھیژن وەلاتێن دن.
بەرپرسێن پایەبلندێن یەکیتیا نشتیمانی یا کوردستانێ (یەنەکێ) و حکوومەتا ھەرێما کوردستانێ، ژ وان ژی جیگرێ سەرۆکوەزیرێ ھەرێما کوردستانێ قوباد تالەبانی، گەلەک جاران بزاڤ کریە کو ڤێ پرسگرێکێ ب بەرپرسێن ترکیێ رە چارەسەر بکن، لێ ھەتا نھا دانووستاندنێن وان چ ئەنجامەکێ بەرچاڤ نەبوویە.
