رێڤەبەریا خوەسەر یا رۆژئاڤایێ کوردستانێ و حکوومەتا سووریەیێ ئیرۆ جڤیان و د جڤینا خوە دە تەکەز ل سەر بجیھانینا خالێن پەیمانا 10ێ ئادارێ کر.
مەدیایا گرێدایی رێڤەبەریا خوەسەر یا رۆژئاڤایێ کوردستانێ ئیرۆ رۆژا سێشەمبێ، 7ێ جۆتمەھا 2025ێ، بەلاڤ کریە، “جڤینا د ناڤبەرا شاندەیا رێڤەبەریا خوەسەر و حکوومەتا سووریەیێ دە ل شامێ ب داوی بوو، کو چەند دەمژمێران ب ئاوایەکی ڤەشارتی بەردەوام بوو.”
مەدیایا ناڤبری ئاماژە ژی دایە کو، د وێ جڤینێ دە ھەروەسا بەحسا چاوانیا بجیھانینا پەیمانا 10ێ ئادارێ یا د ناڤبەرا ھێزێن سووریەیا دەمۆکراتیک (ھەسەدێ) و حکوومەتا سووریەیێ دە و رەوشا ڤێ داویێ یا حەلەبێ ژی ھات کرن.
ھەر وێ چاڤکانیێ ئەشکەرە ژی کریە کو، شاندەیا رێڤەبەریا خوەسەر ژ فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی، ئیلھام ئەحمەد و رۆھلات عەفرین پێک ھاتبوو و شاندەیا حکوومەتا سووریەیێ ژی ژ ئەحمەد شەرع و ئەسعەد شەیبانی پێک ھاتبوو.
د وێ جڤین دە، ھەروەسا دانووستاندن ل سەر مژارێن سیاسی و ئەولەھیێ د چارچۆڤەیا پەیمانا 10ێ ئادارێ دە ژی ھاتن کرن.
وەزیرێ بەرەڤانیێ یێ سووریەیێ مورحەف ئەبوو قەسرا ژی ھەر ئیرۆ ل سەر ھەژمارا خوە یا تۆرا جڤاکی یا X داخویانیەک بەلاڤ کر و تێ دە گۆت، “بەری دەمەکێ کێم، ل شامێ، ئەز ل گەل فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی جڤیام.”
وەزیرێ بەرەڤانیێ یێ سووریەیێ ئاماژە ژی دا، “مە ل ھەڤ کر کو ل ھەمی ئەنی و خالێن لەشکەری یێن ل باکور و باکورێ رۆژھلاتێ سووریەیێ ئاگربەستەکا بەرفرەھ بهێت راگھاندن و ئەڤ پەیمان دەملدەست بکەڤە مەریەتێ.”
