هەڤسەرۆکێن گشتی یێن دەم پارتیێ تولای حاتیمۆگوڵار و تونجەر باکرهان، بەرتەکەکە توند نیشانی تانه‌لێدانا ترکیەیێ یا ل دژی بریارا دادگەها مافێن مرۆڤان یا ئەورۆپایێ (DMME) یا دەربارێ گرتنا سه‌لاحه‌ددین دەمیرتاش دە دان.
تولای حاتیمۆگوڵار راگهاند، “ئیترازا ل دژی بریارا دادگەها مافێن مرۆڤان یا ئەورۆپایێ، ئیسرارکرنا ل سەر نەقانوونیبوونێ و زەراردایینا ل ئاشتی و دادوەریا جڤاکی یە.” هەروها گۆت: “ئەڤ 9 سالن سه‌لاحه‌ددین دەمیرتاش، فیگەن یوکسەکداغ و ب دەهان هەڤالێن وان ب کۆمپلۆیەکێ وەکە دیل هاتنە گرتن.”
حاتیمۆگوڵار هەروه‌ها دا زانین، ئەو ڤێ نەحەقیێ قەبوول ناکن کو کەسێن دڤێ بەشداری پێڤاژۆیا ئاشتیێ ببن د گرتیگەهان دە بن و وها پێ دە چوو: “تێکۆشینا مە یا ژ بۆ ئاشتی، حقووق و دەمۆکراسیێ ل دژی ڤان پێنگاڤێن ئانتی-دەمۆکراتیک دێ بەردەوام بە و یەکانە رێیا زێدەکرنا باوەریا ب براتیێ، ئازادکرنا هەڤالێن مەیە.”
ژ ئالیێ خوە ڤە، هەڤسەرۆکێ دەم پارتیێ تونجەر باکرهان ژی دیار کر کو ل گۆری بریارا دادگەها ئەورۆپایێ دڤێ دەمیرتاش دەملدەست وەرە بەردان، لێ وەزارەتا دادێ ل سەر بەردەوامکرنا ڤێ بێحقووقیێ ئیسرار دکە.
باکرهان تەکەز کر: “وەکە دەم پارتی، ئەمێ هەتا داویێ ژ بۆ ئازادیا فیگەن یوکسەکداگ، سه‌لاحه‌ددین دەمیرتاش و هەموو هەڤالێن خوە یێن کو د دۆزا کۆمپلۆیا کۆبانێ دە هاتنە دارزاندن، تێکۆشینێ بکن.”
ئیرۆ 8ێ جۆتمەهێ وەکی ژڤانێ دادگەها مافێن مرۆڤانا ئەورۆپایێ ژ بۆ رایەدارێن ترکیەیێ هاتبوو دیارکرن، کو سه‌لاحه‌ددین دەمیرتاش ئازاد بکن.
هەڤسەرۆکێن بەرێ یێن هه‌ده‌پێ سه‌لاحه‌ددین دەمیرتاش و فیگەن یۆکساداغ ل رۆژا 4ێ جۆتمەها 2016ێ ب تۆهمەتا تەڤلیبوونا د دۆزا کۆبانیێ دە هاتبوون گرتن.
دۆزا کۆبانیێ پشتی خوەپێشاندانێن بەرفرەهێن ژ بۆ پشتگریا باژارێ کۆبانیێ ل جۆتمەها 2014ێ هات دەستپێکرن کو توندووتووژی ژێ پەیدا بوون. دەمیرتاش ب 42 سال و فگەن یوکسەکداغ ژی ب 32 سالێن جەزایێ گرتیگەهێ هاتن جەزاکرن.
هەر چەند دادگەها مافێن مرۆڤان یا ئەورۆپایێ سێ جاران داخوازا بەردانا دەمیرتاش کریە ژی، لێ ئەو بریار هین نەهاتیە بجهئانین. تێ پایین کو ب دەستپێکرنا پێڤاژۆیا ئاشتیێ و ئاڤاکرنا کۆمیسیۆنەکە پارلەمەنتۆیێ ژ بۆ پێشڤەبرنا وێ پێڤاژۆیێ رە، هن گرتیێن سیاسی بێن ئازادکرن و دەمیرتاش ژی یەک ژ وان بە.
