سەرۆکێ ھەرێما کوردستانێ نێچیرڤان بارزانی راگھاند، دەستوورا ئیراقێ ب ناڤ فەدەرالە، لێ د راستیێ دە ژ بلی فەدەرالیزمێ ھەر تشتە. ھەروھا تەکەز کر، تشتێ ئیراق ل ھەمبەر ھەرێما کوردستانێ دکە “ناڤەندپارێزیەکا گەلەکی بھێزە.”
ئەڤ داخویانی ئیرۆ چارشەمێ، 8ێ جۆتمەھا 2025ێ، د پانەلەکا تایبەتا دیدارا میری دە، ژ ئالیێ سەرۆکێ ھەرێما کوردستانێ ڤە ھاتن دایین.
“دەستوور ھاتیە بنپێکرن و ئیراق نە فەدەرالە”
نێچیرڤان بارزانی گۆت، سەرکردایەتیا کورد د ئاڤاکرنا ئیراقەکا نوو دە ت کێماسی نەکریە و دەستنیشان کر: “دەستوورا ئیراقێ دەستکەفتەک مەزن بوو کو نابە ئەم کێم بنرخینن، لێ گەلۆ دەستوور وەکە خوە ھاتیە جیبجیکرن؟ بێگومان نا.”
سەرۆکێ ھەرێمێ دیار کر، ژ بۆ دیتنا ئیراقەکا خوەشگوزەران ژ ئالیێ سیاسی، جڤاکی و ئابۆری ڤە، شەرتێ یەکەم پابەندبوونا ب دەستوورێیە. ھەروھا گۆت: “پرسگرێکا ھەری مەزن یا وەلاتی ئەوە کو ھەتا نھا نایێ زانین سیستەما وەلات فەدەرالە یان ناڤەندییە. ئیراق د ناڤەرۆکا خوە دە ژ بلی فەدەرالیزمێ ھەر تشتە.”
د ھەمان دەمێ دە، نێچیرڤان بارزانی تەکەز کر: “ئەز ب خوەباوەری دبێژم کو کووراھیا ستراتەژیکا ھەرێما کوردستانێ بەغدایە، لەوما دڤێت ئەم ب وان رە بگھیژن ئەنجامەکێ.”
“یەکگرتنا کوردان ل بەغدایێ چاڤکانیا ھێزێیە”
دەربارێ ھلبژارتنێن پارلەمانا ئیراقێ دە، نێچیرڤان بارزانی ئەشکەرە کر کو ھلبژارتنا ڤێ جارێ گەلەکی گرینگە و دەستپێکا قۆناغەکا نوویە، لەوما دڤێت ھەموو ئیراقی ب ھەستیاری نێزیک ببن.
سەرۆکێ ھەرێما کوردستانێ گۆت: “دڤێت ئەم وەکە کورد بەشداری وان ھلبژارتنان ببن و خوە ئیسبات بکن، ژ بەر کو یەکگرتنا کوردان ل بەغدایێ چاڤکانیا ھێزێیە ژ بۆ ھەرێما کوردستانێ.”
پێکانینا کابینەیا نوو و پرسا مووچەیان
ل سەر ھلبژارتنێن پارلەمانتۆیا کوردستانێ و پێکانینا کابینەیا دەھەما حکوومەتێ، نێچیرڤان بارزانی دا زانین، ھلبژارتنەکا گەلەکی سەرکەفتی ل ھەرێمێ برێڤە چوویە. ھەروھا گۆت: “راستە پێڤاژۆیا پێکانینا کابینەیا نوو دەمەکە درێژ کشاند، لێیا گرینگ ئەوە کو نھا پەیوەندیەکە گەلەکی باش د ناڤبەرا پەدەکێ و یەەنکێ دە ھەیە.”
ھەروھا ئەشکەرە کر ژی، وان قۆناغێن گرینگ لگەل یەنەکێ دەرباس کرنە و ل سەر نێرینا سیاسی یا ژ بۆ پاشەرۆژێ و چاوانیا رەفتارکرنا لگەل بەغدایێ “بەلگەیەکە ھەڤبەش” ئامادە کرنە و تەنێ لھەڤکرنا ل سەر پۆستان مایە. لێبەلێ، وی گۆت کو ئەو نە د وێ باوەریێ دەیە کو کابینەیا دەھەم بەری ھلبژارتنێن پارلەمانا ئیراقێ وەرە پێکانین.
سەرۆکێ ھەرێما کوردستانێ بەحسا پرسگرێکا مووچەیان ژی کر و گۆت: “پشتی ھلبژارتنێن پارلەمانا ئیراقێ، دڤێت ھەم دەستوور وەکە خوە وەرە جیبجیکرن، ھەم ژی دڤێت پرسگرێکا مووچەیان ب داوی ببە.”
