بولدان: ئۆجالان داخواز کریە کو کۆمیسیۆن دەملدەست سەردانا ئیمرالیێ بکە
ئەنداما شاندا ئیمرالیێ پەرڤین بولدان راگھاند، رێبەرێ پەکەکێ عەبدوللاھ ئۆجالان داخواز کریە کو کۆمیسیۆنا پارلامەنتۆیێ دەملدەست سەردانا ئیمرالیێ بکە، دا کو لەزێ بدە پێڤاژۆیا چارەسەریێ.
ئەنداما شاندا ئیمرالیێ یا دەم پارتیێ پەروین بولدان دەربارێ ھەڤدیتنا داوی یا لگەل رێبەرێ پەکەکێ عەبدوللاھ ئۆجالان، دیار کر کو ئۆجالان ب کەلەجانەکا مەزن ل بەندا سەردانا کۆمیسیۆنا کو ل پارلامەنتۆیا ترکیەیێ ھاتیە ئاڤاکرنە و وھا گۆت: “ئۆجالان داخواز کر کو کۆمیسیۆن دەملدەست سەردانا ئیمرالیێ بکە، ژ بەر کو ئەو دخوازە ریتما پێڤاژۆیا ئاشتی و چارەسەریێ بلند ببە.”
بوولدان دا زانین، ئەو ل بەندێ نە د ناڤا ھەفتەیەکێ یان دو ھەفتەیان دە، شاندەیەک کو ژ پێنج کەسان پێک بێ، سەردانا ئیمرالیێ بکە و لگەل ئۆجالان بجڤە.
ل گۆری بولدان، ئۆجالان کارێ کۆمیسیۆنێ وەک “گەلەک ھێژا” ب ناڤ کریە و گۆتیە کو ئەو ژ نێز ڤە خەباتێن وێ دشۆپینە. پەروین بوولدان ھەر وھا گۆتەگۆتێن کو دبێژن “پێڤاژۆ راوەستیایە ئان ژی بداوی بوویە” رەد کر و تەکەز کر: “پێڤاژۆ بەردەوامە. چقاس زەحمەت بە و ئاستەنگی ھەبن ژی، پێڤاژۆ ددۆمە.”
پێشتر ژی، ھەڤسەرۆکا گشتی یا دەم پارتیێ تولای ھاتیمۆغلاری رۆژا 7 جۆتمەھێ پشتگری دابوو داخویانیا سەرۆکێ گشتی یێ مەھەپێ دەولەت باخچەلی گۆتبوو: “باخچەلی ئیرۆ گۆت، ‘کۆمیسیۆن دکارە بچە ئیمرالیێ و ل سەر ناڤێ جڤاکا ترکیەیێ چ پرسان دخوازن بلا ژێ بکن و ژ رایا گشتی رە پارڤە بکن’. ئەم تەڤلی ڤێ نێرینێ دبن.”
ھاتیمۆغلاری تەکەز کربوو، ئەڤ پێنگاڤ ژ بۆ پێشەرۆژا پێڤاژۆیێ گەلەک گرینگە و وھا پێ دە چوو: “دڤێت کۆمیسیۆن تەکەز بچە ئیمرالیێ و وەک دانوستاندکار ل گەل برێز ئۆجالان بجڤە. ئەڤ یەک ژ بۆ دەرباسبوونا قۆناغەکا نوو گەلەک گرینگە.”
