مەزلووم عەبدی: ھەسەدە دێ ببە بەشەک ژ ئارتێشا نوو یا سووریەیێ
فەرماندارێ گشتی یێ هەسەدێ، مەزلووم عەبدی، دا زانین کو ھەسەدە دێ تەڤلی ئارتێشا نوو یا سووریەیێ ببە و ژ بۆ دەستپێکرنا ڤێ پێڤاژۆیێ دێ د رۆژێن پێش دە شاندەک سەردانا شامێ بکە. عەبدی ھەروھا دەستنیشان کر، یەکینەیێن ئەنتی-تەرۆرێ (YAT) دێ ل سەرانسەرێ سووریەیێ شەرێ داعشێ بکن.
فەرماندارێ گشتی یێ ھەسەدێ مەزلووم عەبدی، دوھ 10ی جۆتمەھێ ب بۆنەیا سالڤەگەرا 10ێ یا دامەزراندنا ھەسەدێ داخویانیەک دا و ئەڤ رۆژ ل گەلێ سووریەیێ، شەرڤان و ھەڤالبەندێن خوە پیرۆز کر. عەبدی دیار کر کو سەرکەفتنێن ھەسەدێ ب سایا پشتەڤانیا گەلێ سووریەیێ ب ھەموو پێکھاتەیێن خوە پێک ھاتیە.
“ئەم دێ د ئاڤاکرنا ئارتێشا سووریەیێ یا نوو دە جھ بگرن”
عەبدی بال کشاند سەر قۆناغا نوو یا ل سووریەیێ و وھا گۆت: “پشتی تێکچوونا رەژیما بەعس، سووریەیەکا نوو ھاتە ئاڤاکرن و ل سووریەیێ ئارتێشەکا نوو تێ ئاڤاکرن. ئەم ژی وەکە ھێزەکا سەرەکی یا پاراستنا سووریەیێ، دێ د ئاڤاکرنا ئارتێشەکا نوو دە جھ بگرن. ھەسەدە دێ ببە بەشەک ژ ئارتێشا سووریەیێ یا نوو کو تێ ئاڤاکرن.”
ژ بۆ جیبجیکرنا لھەڤکرنا 10ئ ئادارێ، عەبدی راگھاند کو ئەو دێ وەک فەرمانداریا ھەسەدێ د رۆژێن پێش دە شاندەکێ بشینن شامێ دا کو ل گەل وەزارەتا پاراستنێ یا سووریەیێ پێڤاژۆیا تەڤلیبوونا ھەسەدێ یا ژ بۆ ئارتێشێ ب فەرمی دەست پێ بکن.
“ئەزموونا ھەسەدێ دێ ئارتێشا سووریەیێ خورت بکە”
فەرماندارێ گشتی تەکەز کر کو ھەسەدە ب ئەزموونا خوە یا د شەرێ ل دژی داعشێ دە، ب پەروەردەیا 10 سالان، ب خەباتا خوە یا ل گەل ھێزێن ناڤنەتەوەیی و ب پشتەڤانیا گەل، دێ ببە ھێزەکا گرینگ د ناڤا ئارتێشا سووریەیێ دە و دێ بھێز و خورتتر بکە.
رۆلا نوو یا یەکینەیێن دژە تەرۆرێ: شەرێ ل دژی داعشێ ل سەرانسەرێ وەلات
مەزلووم عەبدی دەربارێ پاشەرۆژا یەکینەیێن دژە تەرۆرێ (YAT) دە ژی ئاگاھیێن گرینگ پارڤە کرن و گۆت: “ھێزا مەیا دژی تەرۆرێ، YAT، دێ رۆلەکێ نوو بلیزە. ئێدی نە تەنێ ل باکور و رۆژھلاتێ سووریەیێ، لێ ل سەر ئاستا نیشتیمانی و ل گەل یەکینەیێن دن یێن ئارتێشا سووریەیێ دێ خەباتەکا ھەڤبەش بمەشینە.”
عەبدی ئانی زمان کو ئەو باوەر دکن تەجرووبەیا مەزن یا YAT یا د ڤان سالێن بۆری دە، دێ د پێڤاژۆیا نوو دە رۆلەکێ پێشەنگ د شەرێ ل دژی داعشێ و تەرۆرێ دە ل سەرانسەرێ ئەردنیگاریا سووریەیێ بلیزە و ببە سەدەما سەرکەفتنەکا مەزن.
پشتی ھەڤدیتنا فەرماندارێ گشتی یێ ھەسەدێ مەزلووم عەبدی و وەزیرێ بەرەڤانیێ یێ سووریەیێ مەرحەف عەبوو قەسرا یا رۆژا 7ێ جۆتمەھێ، ل ئەنیێن شەر ئاگربەستەکا دەملدەست ھاتبوو راگھاندن.
مەرحەف ئەبوو قەسرا ل سەر ھەژمارا خوە یا تۆرا جڤاکی “X” داخویانیەک بەلاڤ کر و گۆت: “مە ل ھەڤ کر کو ل ھەموو ئەنی و خالێن لەشکەری یێن ل باکور و باکورێ رۆژھلاتێ سووریەیێ ئاگربەستەکا بەرفرەھ وەرە راگھاندن و ئەڤ رێکەفتن دەملدەست بکەڤە وارێ جیبجیکرنێ.”
ئەڤ پێشھات وەک ئەنجاما لھەڤکرنا کو د 10ێ ئادارێ دە د ناڤبەرا رێڤەبەریا خوەسەر و حکوومەتا شامێ دە ھاتبوو ئیمزەکرن، تێ دیتن. ل گۆری وێ لھەڤکرنێ، ژ بۆ جیبجیکرنا خالێن پەیمانێ کۆمیتەیێن ھەڤبەش ھاتبوون ئاڤاکرن، کو خالێن ھەری گرینگ “یەکخستنا سازیێن سڤیل و لەشکەری” و “ناسینا مافێن کوردان د دەستوورێ دە” بوون.
