تونجەر باکرھان: دڤێ سەلاحەدین دەمیرتاش بێ بەردان
ھەڤسەرۆکێ دەم پارتیێ ئاماژە دا کو، دڤێت یاسا سەروەر بە و ئێدی قەیووم نەمینن. ھەروەسا گۆت کو، ئەو داخوازا مافێ پەروەردەھیا ب زمانێ دایکێ و گوھەرتنێن بلەز یێن یاسایێن بنگەھین دکن.
ھەڤسەرۆکێ دەم پارتیێ تونجەر باکرھان ئیرۆ رۆژا سێشەمبێ، 14ێ جۆتمەھا 2025ێ، د جڤینا ھەفتیانە یا پارتیا خوە دە ل پارلامەنتۆیا ترکیەیێ گۆت کو، دڤێت گوھداریا نەرینێن رێبەرێ گرتی یێ پارتیا کارکەرێن کوردستانێ (پەکەکێ) عەبدوللاھ ئۆجالان بێ کرن و سەلاحەدین دەمیرتاش بێ بەردان.
ھەڤسەرۆکێ دەم پارتیێ ھەروەسا گۆت: “گەل ل بەندێیە کو پارلەمەنتۆ د وەرزێ خوە یێ نوو دە رەفۆرمان د چەند یاسایان دە بکە و ھەمی چاڤ ل سەر پێنگاڤێن پێدڤی نە.”
تونجەر باکرھان ئاماژە ژی دا: “وەرن ئەم ڤێ سالا دانانا یاسایان یا پارلامەنتۆیێ بکن سالا چارەسەرکرنا پرسێن دیرۆکی یێن ترکیەیێ. ب جڤینێن لگەل ئۆجالان، بنگەھێن چارەسەریێ خورتتر دبن.”
ناڤبری ھەروەسا راگھاند: “ئەم داخوازا وەلاتیبوونەکا وەکھەڤ دکن، ب رێیا دەستوورێ کو ب وەکھەڤی تەماشەیی ھەمیان بێ کرن. ھەروەسا ئەم داخواز دکن کو، یاسا سەروەر بە و ئێدی قەیووم نەمینن و داخوازا مافێ پەروەردەھیا ب زمانێ دایکێ دکین.”
ھەڤسەرۆکێ دەم پارتیێ ھەروەسا داخوازا گوھەرتنێن بلەز یێن یاسایێن بنگەھین، ب تایبەت ژی یاسایا بەرھنگاربوونا تەرۆرێ، یاسایا سزادانێ و بەردانا گرتیێن سیاسی و نەخوەشان و ڤەگەرا بلەز یا کەسێن کو ژ بەر سەدەمێن سیاسی نەچار مانە ژ وەلاتی دەربکەڤن.
