دارکا مازی دۆسیەکا گەندەلیێ یا حەشدا شەعبی ل مووسلێ پارڤە دکە
هات زانین پارچە ئەردێ دکەڤە رۆژهلاتێ باژارێ مووسلێ ل بەرامبەری دەڤەرا کۆکجەلی یا ل نێزی کۆمەلگەها شرووق، کو یێ شارەدارییا مووسلێ یە، ژ ئالیێ حەشدا شەعبی ڤە هاتیە داگیرکرن و پاشان ئەڤ ئەرد کو پارچەیەک پڕ مەزنە هاتیە دابەشکرن بۆ چەندین پارچە ئەردێن بچووک و پشترە هاتیە فرۆتن.
چاڤکانیێن پێگەها دارکا مازی ئەشکەرە کرن، لیوایا 30ی یا حەشدا شەعبی ب رێیا “جەعفەر جەمیل” برایێ “محەمەد جەمیل” فەرماندارێ لیوایا ناڤبری و “محەمەد عارف” ئەندامێ ئەنجوومەنا پارێزگەها مووسلێ دەست دانییە سەر پارچەیەک ژ ئەردێ مەزن یێ شارەدارییا مووسلێ و د مەها 8 یا ئیسال دە ئەڤ پارچە ئەرد بۆ چەندین پارچەیێن بچووک دابەشکریە و پشترە هاتیە فرۆتن.
چاڤکانیێن دارکا مازی تەکەز کرن، هەر یەک ژ ڤان پارچە ئەردان ب سەرپەرشتییا “عەبدوللا وەحش” ئەفسەرێ ئیستیخباراتێ یێ لیوایا 30 یا حەشدا شەعبی ب بهایێ 10 ملیۆن دینارێن ئیراقی بۆ هەر پارچەیەکێ هاتینە فرۆتن، هەر وەها دەستیرییا ئاڤاکرنا ڤان پارچە زەڤییان ژ ئالیێ “محەمەد جەمی” ڤە تێ دایین.
وەک تێ زانین، لیوایا 30 یا حەشدا شەعبی ب هێنجەتا پاراستنا ئارامی و ئەولەهییا دەشتا نەینەوایێ ل مووسلێ مانە، لێ بەلێ د راستیێ دە ئەو ب خوە چاڤکانیا نەئارامی، دزی و ب هەدەردانا سامانێ دەولەتێنە ل مووسلێ، حەشدا شەعبی ل مووسلێ دەست دانیە سەر مال و مولکێ حکوومەتێ و هەر کارێ دخوازە دکە بێی کو هزرەکێ ژ بۆی یاسا یان ژی سازیێن حکوومەتا ئیراقێ ل ڤی باژاری بکە، تشتا هەری گرینگ ل جەم ڤان میلیشیایان ب تەنێ پاراستنا بەرژەوەندیێن حەشدا شەعبی یە.
ژ ئالیێ خوە ڤە ژ بەر ڤان کارێن نەقانوونی، شێنیێن مووسلێ ژ هێزێن حەشدا شەعبی پر هێرس بوونە و دخوازن ئەڤ هێز مووسلێ بتەرکینن و دەستوەردانێ د سازیێن دەولەتێ دە نەکن.
