مالپەرا مۆنیتەر: ئۆجالان ژ نێچیرڤان بارزانی داخوازا ئالیکاریێ ژ بۆ بداویانینا شەری کریە
مالپەرا مۆنیتەرێ یا ئامەریکایێ د راپۆرەکا خوە دە دا زانین کو رێبەرێ گرتی یێ پەکەکێ عەبدوللاھ ئۆجالان راستەراست داخوازا ئالیکاریێ ژ سەرۆکێ ھەرێما کوردستانێ نێچیرڤان بارزانی کریە.
مالپەرا مۆنیتەر یا ئامەریکایێ ئیرۆ رۆژا سێشەمبی 14/10/2025ێ، د راپۆرەکا خوە دە راگھاندن، ئۆجالان ئالیکاری ژ بۆ گۆتوبێژێن ژ بۆ بداویانینا شەرێ 40 سالی یێ د ناڤبەرا ئارتێشا ترکیەیێ و پەکەکێ دە ژ نێچیرڤان بارزانی خوەستیە.
مۆنیتەر دیار کر کو ھەفتەیا بۆری نامەیەکا ئۆجالان گھیشتیە بەر دەستێ نێچیرڤان بارزانی و تێ دە ھاتیە گۆتن کو ئەنجاما گۆتووبێژێن نھا یێن ژ بۆ بداویانینا شەری “دێ باندۆرێ ل سەر ئیراق و ھەرێما کوردستانێ بکە”.
ئۆجالان د نامەیا خوە یا ژ بۆ نێچیرڤان بارزانی شاندی دە، گۆتیە:
“ئارمانجا من یا د ڤێ پێڤاژۆیێ دە ئەوە کو ئەم بگھێژن چارەسەریەکا ماییندە کو ل سەر بنگەھا پرەنسیبێن دەمۆکراتیک بە، گەلەکی گرینگە کو ھوون ژی سەرکردایەتیا ڤێ پێڤاژۆیێ ھلگرن سەر ملێ خوە.”
سەرۆکێ ھەرێما کوردستانێ نێچیرڤان بارزانی پێنجشەما بۆری چوو سەردانا ئەنقەرەیێ و ل گەل سەرۆککۆمارێ ترکیەیێ رەجەب تەییب ئەردۆگان و وەزیرێ کارێن دەرڤەیێ ترکیەیێ ھاکان فیدان جڤیابوو.
مالپەرا مۆنیتەرێ ژ زاردەڤێ بەرپرسەکی پایەبلندێ هەرێما کوردستانێ دەربارێ ناڤەرۆکا جڤینا ئەردۆگان و نێچیرڤان بارانی دە راگهاندیە:
“د وێ جڤینا کو دەمژمێرەکێ بەردەوام کری دە، نێچیرڤان بارزانی ژ سەرۆککۆمارێ ترکیەیێ خوەست کو ژ بۆ بلەزکرنا ھەبوونا چارچۆڤەیەکا یاسایی باندۆرا خوە ب کار بینە” کو رێ بدە گەریلا ژ چیایێن باشوورێ کوردستانێ داکەڤن.
