وەزارەتا پێشمەرگە: پلەیێن زێدەتری ھەشت ھەزار پێشمەرگە و پلەداران ھاتن بلندکرن
وەزارەتا پێشمەرگەیا حکوومەتا ھەرێما کوردستانێ راگھاند: “د خشتەیێ مەھا بۆری دە، پلەیێن زێدەتری ھەشت ھەزار پێشمەرگەیان ھاتنە بلندکرن.” ھەروەسا گۆت: “دابینکرنا مافێن پێشمەرگەیان و باشترکرنا ژین و ژیارا وان ژ کارێن پێشیێ یێن حکوومەتا ھەرێما کوردستانێ و وەزارەتا پێشمەرگە نە.”
وەزارەتا پێشمەرگەیا حکوومەتا ھەرێما کوردستانێ ئیرۆ چارشەمبێ، 15ێ جۆتمەھا 2025ێ راگھاند: “د خشتەیا مەھا ئیلۆنا 2025ێ دە، پلەیێن ھەشت ھەزار و 721 پێشمەرگە و پلەدارێن وەزارەتا پێشمەرگە ھاتن بلندکرن.”
وەزارەتا پێشمەرگە ئاماژە ژی دا: “دابینکرنا مافێن پێشمەرگەیان و باشترکرنا ژین و ژیارا وان ژ کارێن پێشیێ یێن حکوومەتا ھەرێما کوردستانێ و وەزارەتا پێشمەرگەیان و پێڤاژۆیا رەفۆرمێ نە.”
تەکەز ژی کر: “ھەروەسا ھەمی بزاڤ دێ د ڤی واری دە بەردەوام بن، دا کو پلەیێن ھێزێن پێشمەرگەیێن کوردستانێ د دەمێن خوەیێن یاسایی و ئیداری دە بێن بلندکرن.”
وەزارەتا پێشمەرگە داخواز ژی کر کو، دڤێت پێشمەرگە ل بەرانبەری بلندکرنا پلەیێن خوە وەکی ھەر گاڤ د ئەرکێ پاراستنا ئاخ، سینۆر و گەلێ کوردستانێ و بجھانینا دیسیپلینا لەشکەری یا نووژەن دە بەردەوام بن.
