تاخێن کوردان یێن حەلەبێ د بن دۆرپێچێ دە نە و مەترسیا کارەساتەکا مرۆڤی زێدە دبە
رەوشا مرۆڤی ل تاخێن کوردان یێن حەلەبێ، شێخ مەقسوود و ئەشرەفیێ، ژ بەر دۆرپێچا کو ژ ئالیێ حکوومەتا سووریێ و کۆمێن چەکدار یێن سەر ب حکوومەتا دەمکی ڤە ھاتیە دانین، رۆژ ب رۆژ خرابتر دبە. رێیێن سەرەکی ھاتنە گرتن و ناھێلن سۆتەمەنی و پێدڤیێن بنگەھین دەرباسی تاخان ببن، کو ئەڤ یەک مەترسیا کارەساتەکا مرۆڤی زێدە دکە.
ل گۆری ئاگاھیان، ھەموو رێیێن کو دچن ڤان تاخان ھاتنە گرتن و رێگری ل دەرباسبوونا سۆتەمەنی، کەلووپەلێن پێویست یێن ژیانا رۆژانە و ھەتا چوونووھاتنا وەلاتیان ژی تێ کرن. ئەڤ یەک بوویە سەدەما ئالۆزیەکا مەزن، ب تایبەتی ژ بەر کو نێزیکبوونا وەرزێ زڤستانێ پێویستیا ب سۆتەمەنیێ زێدەتر دکە.
ژ بەر نەبوونا سۆتەمەنیێ، مەترسی ھەیە کو د دەمەکێ نێزیک دە ژەنەراتۆرێن ئەلەکتریکێ راوەستن. راوەستاندنا مووەلیدەیان دێ راستەراست باندۆرەکا نەرینی ل سەر کارێ نەخوەشخانە، نانپێژخانە، دبستان و ناڤەندێن دن یێن خزمەتگوزاریێ بکە.
ل گۆری مەدیا ناڤخوەیی، ژ زێدەتری 46.000 مالباتێن ل ھەردو تاخان، ھەتا نھا تەنێ 3.500 مالباتان پارا خوە یا سۆتەمەنیێ وەرگرتیە، کو ئەڤ یەک رەوشا دژوارا وەلاتیان رادخە بەر چاڤان.
ئەڤ دۆرپێچ د ئەنجاما ئالۆزی و پەڤچوونێن د ناڤبەرا ھێزێن سووریا دەمۆکراتیک (ھەسەدێ) ژ ئالیەکی ڤە و حکوومەتا سووریێ و کۆمێن چەکدار یێن سەر ب حکوومەتا دەمکی ڤە ژ ئالیەکی دن ڤە، پێک ھاتیە.
تەڤی کو د مەھا تیرمەھێ دە پشتی ھەڤدیتنا وەزیرێ بەرەڤانیێ یێ سووریێ لگەل فەرماندارێن ھەسەدێ ل سەر راوەستاندنا شەری لھەڤکرنەک چێبووبوو، لێ دۆرپێچ ھینا ژی بەردەوامە. ھەروھا، د 26ێ ئیلۆنێ دە کۆمێن چەکدار یێن سەر ب حکوومەتا دەمکی ڤە رێیا حەلەب-رەقایێ ل دەڤەرا دێر حافرێ گرتن و دۆرپێچ گرانتر کرن.
د بوویەرەکا داوی دە، ل گۆری چاڤکانیێن نێزیکی ھەسەدێ، ل نێزیکی چەرخەرێیا شیھان یا حەلەبێ، ئێریشەک ل دژی بەندەکا کۆنترۆلێ یا ئاساییشێ پێک ھات و د ئەنجامێ دە دو ئەندامێن ئاساییشێ ب گرانی بریندار بوون.
