سیپان حەمۆ: ھەسەدە گارانتیا یەکتیا سووریەیێیە
ئەندامێ فەرمانداریا گشتی یا ھێزێن سووریا دەمۆکراتیک (ھەسەدێ) سیپان حەمۆ راگھاند، ھێزێن وان ئامادە نە تەڤ ل ئارتێشەکا نوو یا نەتەوەیی یا سووریەیێ ببن، لێ تەکەز کر کو ئەڤ یەک ب شەرتێ پاراستنا ناسنامە و رێزگرتنا ژ بۆ تێکۆشینا ھەسەدێ و مسۆگەرکرنا مافێن ھەموو پێکھاتەیێن سووریەیێ ڤە گرێدایییە. حەمۆ ھەروھا دۆسیایا عەفرینێ وەک “پیڤانا راستەقین” یا جدیەتا حکوومەتا ڤەگوھێزا شامێ بناڤ کر.
سیپان حەمۆ، کو د ھەمان دەمێ دە سەرۆکێ کۆمیتەیا لەشکەری یا دانووستاندنێن لگەل حکوومەتا ڤەگوھێز دە یە، د داخویانیەکێ دە ژ مالپەرا فەرمی یا ھەسەدێ رە، ھەلوەستا ھێزێن خوە یا ژ بۆ پاشەرۆژا سووریەیێ ئەشکەرە کر.
حەمۆ د دەستپێکا ئاخافتنا خوە دە ئاماژە ب ئارمانجا بنگەھین یا ھەسەدێ کر و گۆت، “ژ دەما دامەزراندنا خوە ڤە، ئەم ژ بۆ ئاڤاکرنا سووریەیەکا دەمۆکراتیک و ھەڤبەش، کو مافێن ھەموو پێکھاتەیان بێ جوداھی بپارێزە، تێدکۆشن. مە د ڤێ رێیێ دە بەردێلێن گران دانە.”
“تەڤلیبوون ئارمانجەکا ستراتەژیکە”
سیپان حەمۆ ئیدیعایێن کو دبێژن ھەسەدە پرۆسەسا تەڤلیبوونێ (ئەنتەگراسیۆن) دەرەنگ دخە رەد کر و گۆت: “بەرەڤاژی ڤێ یەکێ، ئەم دخوازین ئارتێشا نوو نەهێلن و ئەم ڤێ یەکێ وەک ئارمانجەکا ستراتەژیک دبینن. ئەم باوەر دکن کو ھەسەدە بنگەھا ئاڤاکرنا ئارتێشەکا نەتەوەیی یە و ئارتێشەکا وھا بێیی بەشداریا ھەسەدێ نایێ ئاڤاکرن.”
لێ بەلێ، حەمۆ ھشیاری دا کو ھندەک ئالی ھەول ددن تەڤلیبوونێ ل گۆری “نێرینا خوە یا تەنگ” شیرۆڤە بکن و دخوازن ھەسەدێ تونە بکن. ھەروھا گۆت ژی: “ئەم ڤان ھەولدانان قەت قەبوول ناکن. تەڤلیبوونا کو ئەم دخوازن، دڤێت ناسنامەیا ھەسەدێ بپارێزە و رێزێ بدە تێکۆشینا وێ. دڤێت مافێن ھەموو پێکھاتەیێن سووریەیێ، ژ سونی، دورزی، کرستیان، کورد و عەلەویان، وەرن ناسکرن.”
“عەفرین پیڤانا جدیەتێیە”
ھەمۆ دیار کر، ژ بۆ ئاڤاکرنا باوەریێ، دڤێت حکوومەتا ڤەگوھێز گاڤێن بەربچاڤ باڤێژە و دۆسیایا عەفرینێ وەک میناکەکا سەرەکی نیشان دا: “مە ژ وان رە گۆت، ھەلوەستا وە یا ل ھەمبەری عەفرینێ دێ پیڤانا راستەقینە یا جدیەتا وە بە. دڤێت کۆچبەرێن عەفرینێ ڤەگەرن، زەرارێن وان بێن دایین و کەسێن کو بنپێکرن کرنە بێن دادگەهکرن. ئەگەر ھوون ب عەدالەت نێزی عەفرینێ ببن، ھنگی ئەم دکارن ب نێرینەکا جودا ل وە بنێرن.”
“ھەسەدە گارانتیا یەکتیا سووریەیێیە”
ئەندامێ فەرمانداریا گشتی یا ھەسەدێ جارەکە دن تەکەز کر، ھەسەدە ھێزەکا نەتەوەیی یە کو دکارە ھەموو پێکھاتەیان بینە جەم ھەڤ. ھەروھا گۆت: “ھەیا کو حکوومەت گاڤێن دلنیاکەر نەهاڤێژە، ھەسەدە دێ وەک ھێزا پاراستنا ھەبوون، ژیان و ناسنامەیا گەلێ مە بمینە. لەزکرن یان دەرەنگخستنا ڤێ پرۆسەسێ ب گاڤێن پێشین یێن حکوومەتا ڤەگوھێز ڤە گرێدایییە.”
