ئۆزچەلیک: دڤێت ھەمی کوردێن جیھانێ پشتگریا گەلێ مە یێ رۆژئاڤایێ کوردستانێ بکن
سەرۆکێ گشتی یێ پارتییا وەلاتپارێزێن کوردستانێ (PWK) مستەفا ئۆزچەلیک دوھی 19ێ جۆتمەھا 2025ێ ل ستۆکھۆلما پایتەختا سوێدێ سمینارەک ژ بۆ برێڤەبر و ئەندامێن PWK و ھەژمارەکا نوونەرێن پارتی، رێکخستن و کەساتیێن کورد ل دار خست.
نڤێسینگەها راگەھاندنێ یا PWK راگھاند: “رێڤەبر و ئەندامێن PWK یێن ل سوێدێ، نوونەرێن پەدەکێ (پارتییا دەمۆکراتیا کوردستانێ)، پەدەکە-ئیران، پەسەکە، ئەنەکەسە، پارتییا دەمۆکراتا کورد ل سوورییێ-ئەل پارتی، ھەڤکارییا ھێزێن کوردستانی ل سوێدێ، کۆنفەدەراسیۆنا رەڤەندا کوردستانی، دیاکورد، فەدەراسیۆنا کۆمەلەیێن کوردستانێ ل سوێدێ، یەکتییا ژنێن کوردستانێ ل سوێدێ، یەکتییا نڤیسکارێن کورد ل سوێدێ، کتێبخانەیا کوردی ل ستۆکھۆلمێ و گەلەک سییاسەتمەدار و رەوشەنبیرێن کورد تەڤلی سمینارێ بوون.”
نڤێسینگەها ناڤبری ئەشکەرە ژی کر: “مستەفا ئۆزچەلیک، د سمینارێ دە، د دەربارێ پێڤاژۆیا دامەزراندنا PWK، دۆزا گرتنێ یا ل سەر PWK و خەباتێن PWK یێن ل کوردستانێ دە ئاگاھداری دا. ھەروەھا مستەفا ئۆزچەلیک د دەربارێ “پێڤاژۆیا نووع”یا ل باکورێ کوردستانێ، رەوشا رۆژئاڤا، باشوور و رۆژھلاتێ کوردستانێ و سییاسەتا PWK یا ل دیاسپۆرایێ دە بیر و رایێن PWK ئانی زمان.”
ھەر ل گۆری وێ نڤێسینگەهێ، مستەفا ئۆزچەلیک بال کشاند سەر گرینگی و پێویستییا ھەڤکاری و تفاقا نەتەوەیی، نیشتیمانی یا ل باکورێ کوردستانێ و کۆردیناسیۆنا د ناڤبەرا ھەر چار پەرچەیێن کوردستانێ دە.
ھەر د وێ راگھاندنێ دە ھاتیە کو، ژ بۆ ڤێ رەوش و پێڤاژۆیا کو ئەم ل باکورێ کوردستانێ تێ دە دەرباس دبن، مستەفا ئۆزچەلیک ھەم گرینگییا تفاقا ستراتەژیک یا کوردستانی و ھەم ژی گرینگییا ھەڤکارییەکا بەرفرەھ یا ل سەر داخوازێن بلەز یێن ملەتێ کورد ئانی زمان.
نڤێسینگەها راگەھاندنێ یا PWK ھەروەسا راگھاند: “مەستەفا ئۆزچەلیک بانگ ل ھەموو کادرۆیێن کوردستانی، ئازادیخواز و دەمۆکرات کر دا کو ژ بۆ ئاڤاکرنا پارتییەکا خورت ل باکورێ کوردستانێ، پشتگرییێ بدن سیاسەت و کولتورا نوویا PWK.”
نڤێسینگەها ناڤبری ھەروەسا گۆت: “مستەفا ئۆزچەلیک جارەکا دن، پشتگرییا PWK ژ بۆ بەرنامە و شاندا کو د کۆنفەرانسا ب بەشدارییا ھەموو ئالییێن کوردی یێن رۆژئاڤایێ کوردستانێ کو د 26ێ نیسانا 2025ێ یا ل قامشلۆیێ دە ھاتبوو دییار کرن ئانی زمان. ئۆزچەلیک گۆت “ئیرۆ دڤێت ھەموو کوردێن جیھانێ پشتگرییا گەلێ مەیێ رۆژئاڤایێ کوردستانێ بکن دا کو گەلێ مە بکاربە ستاتویەکە ملی، جۆگرافیک، سییاسی بدەست بخە”.
ھەر ل گۆری وێ راگھاندنێ، ئۆزچەلیک دەستکەفتنا فەدەرەیا ل باشوورێ کوردستانێ وەکی دەستکەفتنا ھەموو کوردێن جیھانێ پێناسە کر و بال کشاند سەر گرینگی و پێویستییا ئاڤاکرنا حکوومەتەکا ھەڤبەش یا کو ھێزا پەشمەرگە، ئابۆری، ئەولەکاری و دیپلۆماسییا باشوورێ کوردستانێ بکە یەک. مستەفا ئۆزچەلیک گۆت کو، دکارە فرسەندێن دیرۆکی بینە بەر دەریێ خووشک و برایێن مەیێن رۆژھلاتێ کوردستانێ و ژ بۆ گەلێ مە بکاربە ژ وان فرسەندان فەیدێ وەربگرە، بەرییا ھەر تشتی یەکرێزیا ناڤمالا کوردان بێ ئاڤاکرن.
ھەروەسا د وێ راگھاندنێ دە ھاتیە کو، د پارا دویێ یا وێ سمینارێ دە، تەڤلیبوویییێن سمینارێ پرسێن خوە کرن، بیر و رایێن خوە ئانین زمان و مستەفا ئۆزچەلیک ژی بەرسیڤا پرسێن وان دا.
