وەزیرێ دادێ یێ ترکیەیێ: مە گەلەک قه‌ده‌غەیێن ل سەر زمانێ کوردی راکرنە
وەزیرێ دادێ یێ ترکیەیێ یلماز تونچ راگهاند، د دەما دەستهلاتداریا ئاک پارتیێ دە گەلەک قه‌ده‌غەیێن ل سەر زمانێ کوردی هاتنە راکرن. تونچ دیار کر کو د چارچۆڤەیا “پرۆسەسا ترکیەیا بێتەرۆر” دە گاڤێن گرینگ هاتنە ئاڤێتن و وەک میناک بکارئانینا کوردی ل تەلەڤیزیۆنا فەرمی و مافێ پاراستنێ ب زمانێ زکماکی ل دادگەهان نیشان دا.
وەزیرێ دادێ یێ ترکیەیێ یلماز تونچ، دوهـ 20ێ جۆتمەهێ د مەراسیما ڤەکرنا سالا ئاکادەمیکا زانینگەها بارتن دە دەربارێ گاڤێن کو د وارێ زمانێ کوردی دە هاتنە ئاڤێتن دە ئاخڤی و گۆت، د دەما دەستهلاتداریا پارتیا وی دە گەلەک ئاستەنگی ژ هۆلێ هاتنە راکرن.
تونچ ئەڤ گاڤێن کو هاتنە ئاڤێتن وها رێز کرن: “بکارانینا زمانێ کوردی ل تەلەڤیزیۆنا فەرمی، ڤەکرنا ئەنستیتویا کوردی، رێدانا ب تۆمەتباران کو ل دادگەهان ب زمانێ خوەیێ زکماکی پاراستنا خوە بکن و رێدانا ب سیاسەتمەداران کو ب زمانێ خوە پرۆپاگاندەیا هلبژارتنێ بکن.”
وەزیرێ دادێ ئیدیعا کر، حکوومەتا وان جوداکاری ژ هۆلێ راکریە و بێیی جوداهی خزمەتا هەموو هەرێمێن ترکیەیێ کریە.
ئەڤ داخویانی د دەمەکێ دەیە، پێشتر سەرۆکێ مەجلسێ نومان کورتولموش نەهشتبوو دایکا ئاشتیێ نەزاهات تەکە د جڤینێ کۆمسیۆنێ دە ب کوردی باخڤە. بەردەڤکا دەم پارتیێ ئایشەگول دۆگان ژی پشترە د کۆنفەرانسەکە رۆژنامەڤانی دە رەخنە ل ڤێ هەلوەستا کورتولموش گرتبوو و گۆتبوو: “ئەڤ هەلوەست نایێ قەبوولکرن.”
دۆگان گۆت، “ئەندامێن مەیێن د کۆمیسیۆنێ دە پێشنیار کرن کو ئەو دکارن وەرگەرێ بکن، لێ نەهات قەبوولکرن. ئەڤ هەلوەست نایێ قەبوولکرن.”
وەزیرێ دادێ یێ ترکیەیێ هەروها ئاماژە پێ کر کو زەمینەیەکە لهەڤتێگهشتنێ هەیە و گۆت: “د کۆمیسیۆنێن پارلامەنتۆیێ دە جڤینێن گرینگ هاتن لدارخستن. دەما ئەڤ زەمینەیا کو هاتیە ئافراندن ببە دائیمی، وێ دەمێ ترکیە دێ ژ تەرۆرێ رزگار ببە.”
یلماز تونچ ئەڤ پرۆسە ب “دەستوورەکە نوو یا سڤیل” یا کو ژ ئالیێ گەل ڤە وەرە قەبوولکرن ڤە گرێ دا و وەک دەستپێکەکە نوو ژ بۆ “سەدسالا دویەما ترکیەیێ” بناڤ کر.
