ھاتیمۆغلاری داخواز ژ دەستهلاتا ترکیەیێ کر پێنگاڤێن جدی ژ بۆ چارەسەریێ باڤێژن
ھەڤسەرۆکا گشتی یا پارتیا وەکھەڤی و دەمۆکراسیێیا گەلان (دەم پارتی) تولای ھاتیمۆغلاری، د جڤینا کۆما پارتیا خوە یا ھەفتانە دە ل پارلامەنتۆیێ ئاخڤی و بانگ ل دەستھلاتێ کر کو ژ بۆ چارەسەرکرنا پرسا کورد، پێنگاڤێن جدی باڤێژە. ھاتیمۆغلاری دەستنیشان کر کو ترکیە ژ بۆ چارەسەریێ ل پێشیا “دەرفەتەکا دیرۆکی”یە.
د ئاخافتنا خوە دە، ھاتیمۆغلاری سەردانا سەرۆکێ پارلامەنتۆیێ یا دیاربەکرێ و بکارئانینا زمانێ کوردی وەک گاڤەکا “گەلەک گرینگ” ب ناڤ کر و پرسی: “گەلۆ ڤێ دەستپێشخەریێ چ زرار گھاند زمانێ ترکی؟ گەلۆ وەلات پارچە بوو؟ نا، بەرەڤاژی ڤێ، ب ڤێ پێنگاڤێ جڤاک و دەمۆکراسی ب سەر دکەڤن. یێن کو سیاسەتێ ل سەر نژادپەرەستیێ دکن ژی تێک دچن.”
“دڤێت دەستھلات بکەڤە قۆناغا پێنگاڤێن جدی”
ھاتیمۆغلاری بال کشاند سەر گرینگیا ئاڤێتنا گاڤێن شێنبەر و وھا پێ دە چوو: “یێن کو ڤان گاڤان ناخوازن، ھەر پاشکەتنەک د پێڤاژۆیێ دە وێرەک دکە کو ل دژی پێڤاژۆیێ دەرکەڤن، لەوما ئەرک و بەرپرسیاریا ھەر کەسی دیارە. پێویستە کو دەستھلاتداری و دەولەت بکەڤن قۆناغەکا پێنگاڤێن جدی کو ب رەفۆرمێن یاسایی دەست پێ بکن و ب لەز تەدبیرێن کو باوەریێ ئاڤا دکن، وەربگرن.”
“دەرفەتەکا دیرۆکییە”
ھەڤسەرۆکا گشتی یا دەم پارتیێ تەکەز کر، ئاڤاکرنا کۆمیسیۆنەکێ ژ بۆ دانینا چارچۆڤەیەکا یاسایی یا پێڤاژۆیا ئاشتیێ دێ باوەریێ خورت بکە و رێ ل بەر سەرکەفتنێ ڤەکە. ھاتیمۆغلاری گۆت: “ترکیە ژ بۆ چارەسەرکرنا پرسگرێکەکا سەد سالی و بداویکرنا شەر و پەڤچوونێن 50 سالی ل بەر دەرفەتەکە دیرۆکییە، ژ بەر ڤێ یەکێ دڤێت ژ بۆ ڤێ پێڤاژۆیێ کار بێ کرن.”
