مەسروور بارزانی: نەخوەشخانەیا نوو وەفاداری ژ بۆ قوربانیێن دەڤەرا ئامێدیێ یە
سەرۆکوەزیرێ هەرێما کوردستانێ مەسروور بارزانی، ئیرۆ 22ێ جۆتمەهێ د مەراسیمەکە تایبەت دە ل دەڤەرا ئامێدیێ، نەخوەشخانەیا نووژەن یا شۆرەش-هێتیت ڤەکر. د مەراسیمێ دە، سەرۆکوەزیر بارزانی گۆتارەک پێشکێش کر و تەکەزی ل سەر گرنگیا پرۆژەیێ ژ بۆ خەلکێ دەڤەرێ کر.
سەرۆکوەزیر مەسروور بارزانی د دەستپێکا ئاخافتنا خوە دە پیرۆزباهی ل خەلکێ کر و گۆت: “ئەز ڤەکرنا نەخوەشخانەیا شۆرەش-هێتیت ل هەموو خەلکێ ڤێ دەڤەرێ پیرۆز دکم و هێڤیدارم کو کەس نەچار نەبە سەردانا وێ بکە. لێ ئەز پشتراستم کو ئەگەر هاتن، دێ د دەستێن ئەولە دە بن و ژ ئالیێ پزشک و پەرەستاران ڤە ب ئاوایەکی هەری باش خزمەت ل وان بێ کرن.”
سەرۆکوەزیر بارزانی ئاماژە ب وێ کر ژی: “من سەردانا بەشێن جودا یێن نەخوەشخانەیێ کر، ب راستی ژی ب ئاوایەکی گەلەکی پێشکەتی هاتیە ئامادەکرن. باوەریا من هەیە کو پزیشک و پەرەستارێن مە یێن گەلەک باش هەنە و دکارن ب ئاوایەکی هەری باش خزمەتا خەلکێ ڤێ دەڤەرێ بکن.”
سەرۆکوەزیرێ هەرێما کوردستانێ هەروها ئاماژە ب سەدەما ستراتەژیکا ئاڤاکرنا ڤێ نەخوەشخانەیێ کر و گۆت: “دڤیابوو مە خزمەتەکە زێدەتر ژ بۆ ڤێ دەڤەرێ بکرا. هەروها ئەڤ داخوازا خەلکێ بوو کو نەخوەشخانەیەکە پێشکەتی ژ بۆ وان بێ ئاڤاکرن، ژ بەر کو گەلەک جاران، ب تایبەتی د دەمسالا زڤستانێ دە، ژ بەر بەرفێ نەخوەش نەدکارین بگهیژن نەخوەشخانەیێن دن یێن ل دهۆک، ئامێدی و هەولێرێ. ژ بەر ڤێ یەکێ بریارا ئاڤاکرنا ڤێ نەخوەشخانەیێ هات دایین.”
د داویا ئاخافتنا خوە دە، سەرۆکوەزیر مەسروور بارزانی تەکەزی ل سەر رۆلا دیرۆکی یا دەڤەرا ئامێدیێ کر و پابەندیا حکوومەتێ ژ بۆ خزمەتکرنا وێ دوبارە کر: “خەلکێ ڤێ دەڤەرێ قوربانیەکە گەلەک مەزن دایە و گەلەک شۆرەشێن کوردان ژ ڤێ دەڤەرێ سەری هلدانە، لەوما نها دۆرا هکوومەتێیە کو ب ئاوایەکی هەری باش خزمەتا وان بکە.”
