28 سال ل سەر کۆمکوژییا گوندێ دێزو کو پەکەکێ 16 کورد تێ دە شەهید کربوون دەرباس بوون
کۆمکوژییا گوندێ دێزو ژ بۆ سیاسەتا پەکەکێ ل هەمبەر خەلکێ باشوورێ کوردستانێ د سالێن نوتان دە وەکی نموونەکێ یە. د شەڤا 21-22 جۆتمەها سالا 1997ێ دە، کۆمەک ژ چەکدارێن پەکەکێ ئێریشی گوندێ دێزو کرن، 28 سال ل سەر ڤێ ئێریشی دەرباس دبن، گوندێ دێزو گرێدایی ناڤچەیا مێرگەسۆر و ناحیەیا شێروانا مەزنە، بەری 28 سالان ئێریشەکا بێ ویژدانانە ل سەر وان هات کرن و پەکەکەئیێن کو ئێریش ل سەر گوندی کربوون ژ دو مالباتان 16 کەس شەهید کرن، د ناڤا شەهیدان دە ژن، زارۆک، گەنج و ئێختیار هەبوون، یەک ژ وان ژنان دوگیان بوو. شەش زارۆکێن ژ مالباتەکی ژی کو تەمەنێ وان د ناڤبەرا 1-12 سالان بوون هاتن شەهیدکرن. چەکدارێن پەکەکێ بۆمبایەک ئاڤێت ناڤ دەرگۆشێن زارۆکان دە و پشتی کۆمکوژیێ ژی ب ڤێ یەکێ ئارام نەبوون و نەسکنین و ئاگر ل جەسەدێن وان بەردا.
دەما ئەڤ گۆتن و ئەڤ شیرۆڤە تێ کرن، هندەک دەردۆر دبیژن کو “ئەڤە تشتەکی ژ راستیێ دوورە، ئەڤە پرۆپاگاندایا دەولەتا ترکە”. هەلبەت کۆمکوژییا گوندێ دێزو راستیەکە و هێژان ژی شاهیدێن وان بوویەران دژین و هەر سال ئەو دچن گۆرستانێ ل سەر مەزارێ وان شەهیدان و ژ بۆی شەهیدێن خوە دگرین. ل گوندێ دێزویێ زارۆکێن کوردان یێن هەژار ب دەستێ کوردان هاتن کوشتن. ئەو کەسێ کو د سالا 1987-1988 ژ ئەنفالێن سەدام رزگار بووبوون، پشتی 10 سالان ب دەستێ پەکەکێ هاتن ئەنفالکرن. ئەڤ نە بوویەرەکا تاکانە بوو، ئەڤە میناکەکا سیاسەتا پەکەکێ یا د سالێن 90ان دە ل هەمبەر باشوورێ کوردستانێ یە.
د سالێن 90ان دە پەکەکێ و ئارتێشا ترک شەر ب ئاوایەکی هەڤبەش ئانین حەفتەنین، بەهدینان، بارزان و خاخورکێ. پەکەکێ خوەست د وان قادێن ستراتەژیک یێن بلند دە سیاسەتا بێ مرۆڤیێ بمەشینە و ڤێ دەرێ بکە سەنگەرێ شەر. ب ڤی ئاوایی خوەستن خەلک نەچاری فەقیری، بێ ئەردی و بێکاریێ ببن ژ بۆی کو ئالۆزیەکا جڤاکی و ئابۆری ل باشوورێ کوردستانێ سەرهلبدە. ژ بەر ئەگەرێ ڤێ سیاسەتێ د سالێن 1990ێ دە کوردێن کو ژ بەر رەژێما سەدام ئەردێ خوە چوول کربوون، نەشیان ڤەگەرن سەر ئەردێ خوە.
گوندێ دێزو ژی بوو قوربانیێ هەمان سیاسەتێ، د سالا 1997ێ دە دەولەتا ترک د سەری دە زاپ و ئاڤا شین، گەلەک سەنگەرێن پەکەکێ ژ وان ستەندن. ل هەمبەر ڤێ بنکەفتنێ فەرماندارێن پەکەکێ ژ بۆی سەردابرنا کادرۆیێن خوە دەست ب ئێریشکرنە سەر گوندێن باشوور کر، دەما کۆمکوژییا گوندێ دێزو چێبووی، فەرماندارێن پەکەکێ دگۆتن ئەڤە تۆلا شەهیدێن مە یێن ئاڤاشینن. کادرۆیێن پەکەکێ ل ئاڤاشین ب دەستێ لەشکەرێن ترک هاتن کوشتن و نیشتەجیهێن گوندێ دێزو نە ل دوور و نە ژی ل نێزیک ڤە چ گرێدان ب ڤێ مژارێ ڤە نەبوو، گەلۆ مەعقوولە بچووکەکی 1 سالی و کورد ژ بۆی تۆلەیێ ب دەستێ کوردان بهێت کوشتن؟ ئەڤە نە تۆلهلدان بوو، ئەڤە کورد کوژی بوو.
دەما ئەڤ کۆمکوژیە هات ئەنجامدان، جەمیل باییک بەرپرسێ بریارگەها ئارگەکێ بوو، دوران کالکان رێڤەبەرێ ڤێ قادێ بوو یا ژێ رە دهات گۆتن زاگرۆس، یێ کو راستەراست ئەڤ کۆمکوژی ئۆرگانیزە کری و فیشک ئاڤێتین فەرماندارەکی پەکەکێ یێ کو هێژان ژی دژیت ئانکو ئامەد مەلازگرت بوو، دبە کو ناڤێ ئامەد مەلازگرت ژ وە رە غەریب نەیێ و وە بهیستبە، ژ بەر کو ئەڤە نها ل سەر مەدیایا پەکەکێ زوو ب زوو دەردکەڤە و بەحسا مافێ مرۆڤان و دەمۆکراسیێ دکە، لێ بەلێ بەحسا کوشتنا زارۆکێن یەک سالی ناکە، و مژارەکا دن یا بالکێش ژی ئەڤە کو ئامەد مەلازگرت د کۆنگرەیا داوی یا پەکەکێ دە ئاخافتنەک کر کو هەر کەس ماتمایی ما. ئامەد گۆت، ” ل گۆر من ئەگەر کوردستانەک چێببە و رێبەر ئاپۆ تێ دە نەبە، ئەو کوردستان نەبە باشترە”. ڤی ئامەد مەلازگرتی کو ب ڤی ئاوا بەحسا ئۆجالان دکە، فەرمانا کوشتنا زارۆکان دابوو، ئەڤ بیرئانین حەقیقەتەکا پر گرینگ دیار دکە، گوندێ دێزو و گەندێ میرۆز و ب دەهان گوندێن دن ل بەر ڤێ سیاسەتا پەکەکێ کەتن و ڤالا بوون و ئەڤ سیاسەتا پەکەکێ هەتا رۆژا مە یا ئیرۆ ب شێوازێن جودا جودا بەردەوامە، پەکەکە هەتا نها بهێلە رەخنەدایینا ڤان بوویەران قەبوول ناکە بەلکو خوە مافدار دبینە و هەمان ئەقلیەت ژی هێژان بەردەوامە.
یێن کو دیرۆکا خوە ژ بیر دکن، رۆژا خوە و پێشەرۆژا خوە ژی نابینن، ژ بەر ڤێ یەکێ نابە ئەم کارەساتا گوندێ دێزو ژ بیر بکن و بدن ژبیرکرن ژی، گوندێ دێزو نە تەفەروعاتە، بەلکو حەقیقەتا سیاسەتا پەکەکێ یە، ژ بەر ڤێ یەکێ ئەم دێ ب رەحمەت و ب روومەت وان شەهیدان ببیر بینن و کەسێن ئەڤ کۆمکوژی ئەنجامداین لەعنەت دکین و ئەم ڤێ بوویەرێ قەت ژ بیر ناکن.
