چاپەمەنییا پەکەکێ: گەریلا دێ سبە گاڤەکا دن یا دیرۆکی باڤێژن!
د چارچۆڤەیا بانگا رێبەرێ پەکەکێ عەبدوللاھ ئۆجالان یا د 27ێ سباتێ دە کو ژ پەکەکێ خوەستبوو چەکان دەینە، کۆنگرەیێ ل دار بخە و خوە هلوەشینە، پەکەکە دێ ژ بۆی نیشاندانا نیەتپاکییا خوە ژ ترکیەیێ رە گاڤەکە نوو باڤێژە.
چاپەمەنییا پارتیا کارکەرێن کوردستانێ (پەکەکێ) راگھاند کو گەریلایێن وان دێ سبە “گاڤەکە دن یا دیرۆکی” باڤێژن.
مەدیایا پەکەکێ ئەشکەرە کر: “د چارچۆڤەیا بانگا رێبەر ئاپۆ و بریارێن کۆنگرەیا 12ێ یا پەکەکێ دە، سبە گەریلایێن ئازادیێ دێ گاڤەکە دن یا دیرۆکی باڤێژن.”
چاپەمەنییا پەکەکێ راگهاند، د کۆنفەرانسەکا رۆژنامەگەریێ دە دێ داخویانیەکا فەرمی وەرە خوەندن و تێ دە بەحسا گاڤا نوو یا پەکەکێ یا ژ بۆ پێڤاژۆیا چارەسەریێ وەرە کرن. چاپەمەنییا پەکەکێ ب تەمامی ئەشکەرە نەکر کا وێ ئەڤ گاڤا کو ب “دیرۆکێ” بناڤ دکن چ بە، لێ بەلێ تێ تەخمینکرن کو هندەک ژ گەریلایێن پەکەکێ ژ دەڤەرەکا هەرێما کوردستانێ بەر ب دەڤەرەکا دن ڤە بچن و جیهێن خوە بتەرکینن.
ل گۆر ئاگاهیان، ئەڤ کۆنفەرانسا رۆژنامەگەری دێ ل قونتارا چیایێ قەندیلێ وەرە لدارخستن.
پشتی بانگا ئۆجالان یا د 27ی سباتا سالا 20205 دە، پەکەکێ راگھاند کو د ناڤبەرا 5-7ێ گولانێ دە کۆنگرەیا خوەیا 12 ل دار خستیە و بریارا هلوەشاندنا خوە دایە.
د مەراسیمەکێ دە ل شکەفتا جاسەنەیێ یا ل ناڤچەیا دووکانێ یا پارێزگەھا سلێمانیێ 11ێ تیرمەھێ کۆمەکە گەریلایێن پەکەکێ کو ژ 30 گەریلایان پێک دهات و د ناڤا وان دە هەڤسەرۆکا کەجەکێ بەسێ هۆزات و سێ بەرپرسێن دن یێن پایەبلند ژی هەبوون، وەکی “نیشانا نیەتپاکیێ” ژ بۆ سەرکەفتنا پێڤاژۆیا چارەسەریێ چەکێن خوە شەوتاندن.
