چەتەیێن پەکەکێ “جوانێن شۆرەشگەر” زارۆکەکی دن یێ 14 سالی رەڤاندن

رێخستنا ب ناڤێ “جوانێن شۆرەشگەر” یا گرێدایی پارتیا کارکەرێن کوردستانێ (پەکەکێ) ل باژارێ کۆبانێ یێ رۆژئاڤا کوردستانێ زارۆکەک دن یێ 14 سالی رەڤاندن.

ژێدەرەکی خوەجھی ژ باژارێ کۆبانی راگھاند: “رێخستنا جوانێن شۆرەشگەر زارۆکێ ب ناڤێ شادی عەلی عەبدی کو تەمەنێ وی د بن 18 سالیێ دە یە، د رۆژا 17/10/2025ێ ل باژارێ کۆبانێ ب مەبەستا کو وی د ناڤا رەفێن یەکینەیێن پاراستنا گەل “یەپەگێ” دە بکن چەکدار رەڤاندیە.

شادی عەلی ژ شینیێن گوندێ قوملغ یێ سەر ب کۆبانێ یە، پێش نها مالباتا وی ل باژارێ دیمەشقی ژیان دکر، لێ پشتی دەستپێکرنا شۆرەشا سووریەیێ د سالا 2011ێ دە ڤەگەرینە گوندێ خوە.

تەڤی کو ھەسەدێ د خزیرانا 2019 دە ب نەتەوێن یەکگرتی رە پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا هێزێن چەکدار دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.

ل گۆری چاڤدێران ئارمانجا رێخستنا “جوانێن شۆرەشگەر” رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پەکەکێ دەیە.