جه‌میل باییك: ئارمانجا ئۆجالان نه‌ترككرنا كوردانه!
هەڤسەرۆکێ کۆنسەیا رێڤەبەرا كه‌جه‌كێ جەمیل باییک، د هەڤپەیڤینەکێ دە دەربارێ “بانگا ئاشتی و جڤاکا دەمۆکراتیک” یا رێبەرێ پککێ ئابدوڵاهـ ئۆجالان دە ئاخڤی و چارچۆڤەیا قۆناغا نوو یا پێڤاژۆیێ شیرۆڤە کر. باییک تەکەز کر، ئارمانجا سەرەکە یا بانگێ نە حەلاندن ئان ژی ئاسیمیلەکرنا کوردانە، بەلکو پێکئانینا “ئەنتەگراسیۆنەکە دەمۆکراتیک”ە.
باییک د بەرسڤێن خوە یێن ژ بۆ ئاژانسا (ئانفێ) یا په‌كه‌كێ دە، دا زانین کو رێبەرێ په‌كه‌كێ ئابدوڵاهـ ئۆجالان د بانگا خوە دە بالێ دکشینە سەر تێکلیا هەزار سالی یا کورد و ترکان و دخوازە ئەڤ تێکلیا کو د 200 سالێن داوی دە هاتیە شکاندن، ژ نوو ڤە وەرە سەرەراستکرن.
ل گۆری باییک، ئۆجالان ژ بۆ پێکئانینا ڤێ براتیێ بەحسا “ئەنتەگراسیۆنا دەمۆکراتیک” دکە و دبێژە: “ئەنتەگراسیۆن نە ئاسیمیلاسیۆنە، نە حەلاندنە و نە ژی ترککرنە. کورد دێ ب ناسنامە، زمان، چاند و خوەرێڤەبەرییا خوە هەبن.”
باییک دەستنیشان کر کو پۆلیتیکایێن ئینکار و تنەکرنێ یێن دەولەتا ترک، کورد ژ کۆمارا ترکیەیێ قوت کرنە و ژ بۆ سەرەراستکرنا ڤێ رەوشێ، دڤێ هەبوونا هەموو ناسنامەیان ب ئاوایەکی دەستووری و یاسایی وەرە مسۆگەرکرن.
باییک هەروها ئاماژە ب وێ یەکێ کر کو سەدەما دەرکەتنا په‌كه‌كێ گرتنا کانالێن سیاسەتا دەمۆکراتیک بوویە، لەوما ئۆجالان دخوازە ترکیە ب دەمۆکراتیکبوونا قادا سیاسی بکەڤە سەدسالا خوە یا دویەمین.
دەربارێ گومانێن گەلێن ل سەر دانینا چەکان و خوەهلوەشاندنا په‌كه‌كێ دە، باییک گۆت کو گەل ب کەلەجانەکە مەزن پێشوازی ل بانگێ کریە، لێ هن گومانێن وان ژی هەنە. هەروها دا زانین ژی، قەبوولکرنا ئۆجالان وەکە موخاتاب پشتی 27 سالان، ب سایا تێکۆشینێ پێک هاتیە و ئەڤ یەک ژ بۆ گەل جهێ دلرەحەتیێ یە.
عه‌بدوللا ئۆجالان ب فه‌رمانا ده‌وله‌ت باخچه‌لی ل 27 سباتا ئیسال 2025ێ بانگا چه‌كدانینێ و خوه‌هلوه‌شاندنێ ل په‌كه‌كێ كر و بێی كو ت گارانتیه‌ك ژ بۆی ئاشتیا راستین و بچووكترین مافێن گه‌لێ كورد هه‌بن.
ئۆجالان گۆت: چه‌كان ده‌ینن، خوه فه‌سخ بكن، مۆدێلا وه نه‌مایه، ده‌وله‌تا نه‌ته‌وی و خوه‌سه‌ری بۆ كوردان نه‌چاره‌سه‌رییه، نه‌ته‌وه‌یا ده‌مۆكراتیك چاره‌سه‌رییه.
د ڤێ پێڤاژۆیێ ده هێژان ت گارانتیه‌ك بۆ كوردان تنه و ناڤێ كورد و كوردستانێ و مافێن چاندی، ناسنامه و زمان ژی نه‌هاتنه نیقاش كرن، ئۆجالان هه‌ر تشت بۆ به‌رژه‌وه‌ندییا تركیه‌یێ كر و خه‌ونا نه‌ته‌وی یا كوردان ل باكورێ كوردستانێ وه‌ندا كر.
