چەکدارێن پەکەکێ ژ کوو ڤەدکشن و ل کوو کۆم دبن…!
پێڤاژۆیا کو، ل ترکیێ و باکورێ کوردستانێ ب ناڤێ “ترکیەیا بێ تەرۆر” دەستپێکری ب ئاوایەک بالکێش برێڤە دچە. باخچەلی بانگی ئۆجالان کر و تشتا ژێ خوەستی ئۆجالان ب نامەیەکا دەستنڤیسا خوە بەرسڤ دا. ئۆجالان گەلەک ب زەلالی تەنێ بەحسا 3 خالان کر.
ئۆجالان گۆت: “دێ پەکەکە دەست ژ چەکان بەردە. پەکەکە کۆنگرەیا خوە دجڤینە و خوە هلدوەشینە، سێیەم ژی ئێدی بەحسا دەولەتبوونا کوردان، فەدەراسیۆن، خوەسەری یان ژی مافێن چاندی ناکن. ئەم دێ “ئەنتەگراسیۆنا دەمۆکراتک” پێکبینن.”
بەیانا ئۆجالان ژ بۆ کەسێن تێبگھن گەلەک زەلال بوو. گەلەک ئالیێن سیاسی، بەرپرسێن ھەرێما کوردستانێ و ھەرکەس و ئالیێن ئاشتیێ دپارێزن دان خویاکرن کو، ئەڤ پێڤاژۆیەک باشە. سەکناندنا شەری ئەرێنیە .
لێ یێن کو پەیاما ئۆجالان خوارووڤیچ نرخاندین، جاردن پەکەکە و بەشەک د ناڤا دەمێ دە بوون. پشتی پەکەکێ کۆنگرەیا خوە لدارخستی و خوە فەسخ کری، ھێژان بەحسا پەکەکێ تێ کرن ھندەک وەک بەرپرسێن پەکەکێ داخویانیا ددن. ئەڤ چەوا هلوەشاندنە، نایێ زانین. ئەگەر راستی تە خوە هلوەشاندیە ھێدی گەرەک ت داخوویانیا ل سەر وی ناڤی نەدی.
ژ ئالیەک دن ڤە، رۆژا 25ێ مەھێ ژ بەرپرسێن پەکەکێ سەبری ئۆک ل باشوورێ کوردستانێ کۆنفەرانسەک چاپەمەنیێ ل دارخست و دا خویاکرن کو پەکەکە ھێزێن خوە یێن چەکدار ب تەمامی ژ ترکیێ ڤەدکشینە. ھەرکەسەکی ژی ئەڤ وەک گاڤەک ژ بۆ ئاشتیێ ئەرێنی نرخاند. لێ گەلۆ رێخستنەک ھاتیە هلوەشاندن و دەست ژ چەکان بەردایە، چەوا ھێژان چەکدارێن خوە ژ دەڤەرەکی ڤەدکشینە. باشە ڤان چەکداران کووڤە دبن؟ دبن باشوورێ کوردستانێ. بەلکی ئەڤ بریار ھەتا رادەیەکی ل ترکیێ دبە سەدەمێ ئارامیەکی، لێ گەلۆ ئەڤ ھێزێن چەکدار ل باشوورێ کوردستانێ دێ چبکن؟ ئەگەر کریارێن خوە یێن ھەتا نھا ل باشوور بەردەوام بکە ئەڤ یەک تێ واتە یا کودێ ببن گەفەک ل سەر دەستھلاتا ھەرێما کوردستانێ.
د ڤێ پرسێ دە پەکەکە نە یەک سەریە و تشتا ئۆجالان دبێژە نە ب دلێ ھەموویانە. گەلەک ب تەکتیکی و درووتی تەڤدگەرن. دێ پێشەرۆژێ دە نەخوەشیێن ڤێ هێن دیتن. ژ ئالیەک دن ڤە پەکەکە ناخوازە راستیا پێڤاژۆیا ھاتیە دەستپێکرن ڤەکری قەبوول بکە و ل گۆرا وێ تەڤبگەرە. پێڤاژۆیا “ترکیەیا بێ تەرۆر” ناڤ و ئارمانجا پێڤاژۆیێ ڤەکرییە و گەلەکی زەلالە. د ڤێ دەربارێ دە دەولەت ژ پەکەکێ ڤەکریتر و زەلالتر خوەدی ھەلوەستە. لێ پەکەکە و گەلەک بەرپرسێن رێخستنێن پەکەکێ ڤە گرێدایی ھەولددن راستیا ھەیی ڤەشێرن و سیاسەتەکا نە دروست رێڤە دبن.
ڤەکری ھەتا کو قەندیل د بن باندۆرا ئیرانێ دە تەڤبگەرە نکارە چ بریارەکا ب ئیستیقرار بدە. ھەتا کو، سەرکێشیا وان ب ئاوایەکی چەپ یێن کەمالیست بکن، دێ د تاریتیەکی دە سیاسەتێ بکن.
یان دێ پەکەکە ژی ب تەمامی گوھ بدە ئۆجالان و ب زەلالی خوەدی ھەلوەستبە یان ژی دێ د ڤێ رێیێ دە پرۆڤاکاسیۆن ھەر ھەبن. سیاسەتا خەلەت یا د ڤێ قۆناغێ دە دبە سەدەما پووچکرنا گاڤێن بێنە ئاڤێتن ژی….
