ھەسەدێ لیستەیا فەرماندارێن خوە ژ بۆ تەڤلیبوونا د ناڤا ئارتێشا سووریەیێ دە پێشکێش کر

ھێزێن سووریا دەمۆکراتیک (ھەسەدێ) لیستەیەک ژ ناڤێن فەرماندارێن خوە رادەستی ھەڤپەیمانیا ناڤدەولەتی کر، ژ بۆ کو تەڤلی ناڤا ئارتێشا سووریەیێ یا نوو ببن. ل گۆری ئاگاھیان، ناڤێن نێزیکی 70 فەرماندارێن کو د شەرێ ل دژی داعشێ دە بەشدار بوونە، د لیستەیێ دە ھەنە.

ل گۆری ژێدەرێن “نۆرز پرێس”، لیستە ناڤێن فەرماندارێن سێ فرقەیێن لەشکەری یێن کو دێ تەڤلی ئارتێشا سووریەیێ ببن، ل خوە دگرە. ل گۆری پلانێ، یەک ژ ڤان فرقەیان دێ ل ھەرێما جزیرێ، یا دویەم ل ھەرێما فراتێ و یا سێیەم ژی ل دێرەزۆرێ بە.

ھەروھا، لیستە ناڤێن فەرماندارێن سێ لیوایێن تایبەت یێن گرێدایی سەرۆکەرکانا ئارتێشێ ژی دحەوینە. یەک ژ ڤان لیوایان دێ ب تایبەتی ل سەر “تێکۆشینا ل دژی تەرۆرێ” بسەکنە و دێ ل سەرانسەرێ ئاخا سووریەیێ ب ھەڤرێزیا ب ھێزێن ھەڤپەیمانیا ناڤدەولەتی رە بخەبتە. ل گۆری ھەمان ژێدەران تێ پایین کو %30 فەرماندارێن د ناڤا دەستەیا سەرۆکەرکانێ دە، دێ ژ ھەسەدێ بن.

ژێدەرێن رۆژئاڤایی راستیا رادەستکرنا لیستەیێ ژ ئالیێ ھەسەدێ ڤە پشتراست کر و گۆت: “ئەم ھێڤیدارین کو تەڤلیبوون د دەمەکێ نێزیک دە پێک وەرە.”

ئەڤ پێنگاڤ د چارچۆڤەیا داخویانیێن بەرێ دە تێ. د 10ێ جۆتمەھێ دە، فەرماندارێ گشتی یێ ھەسەدێ مەزلووم عەبدی د سالڤەگەرا 10ەمینا دامەزراندنا ھێزێن خوە دە گۆتبوو کو ھەسەدە دێ ببە “بەشەکا بھێز یا ئارتێشا سووریەیێ یا کو تێ ئاڤاکرن” و یەکینەیێن وان یێن دژی-تەرۆرێ دێ خەباتا خوە ل سەر ئاستا نیشتیمانی بدۆمینن.

پشترە، د 13 ھەمان مەھێ دە، شاندەکا لەشکەری یا ھەسەدێ سەردانا شامێ کربوو ژ بۆ گۆتووبێژکرنا تەڤلیبوونێ. ئەندامێ فەرمانداریا گشتی یا ھەسەدێ سیپان حەمۆ راگھاندبوو کو ئەو گھشتنە ھندەک “لھەڤکرنێن دەڤکی” لێ ھەتا نھا ت پەیمانێن ئیمزەکری نینن.

د تیرمەھا بۆری دە ژی، نوونەرێ ئامەریکایێ یێ ژ بۆ سووریەیێ تۆماس باڕاجک گۆتبوو: “ھەسەدە ھەڤپارەکێ گرینگە ژ بۆ حکوومەتا ئامەریکی… و دکارە تەڤلی ئارتێشا سووریەیێ ببە.”