دو جڤینێن گرینگ ل سەر پێڤاژۆیا ئاشتیێ تێن کرن
شاندا دەم پارتیێ ژ بۆ ئیمرالیێ دێ لگەل سەرۆککۆمارێ ترکیەیێ رەجەب تەییب ئەردۆگان بجڤە. ھەروەسا کۆمیسیۆنا پێڤاژۆیا ئاشتیێ ژی دێ مێڤانداریا دو وەزیران بکە.
ل گۆری زانیارێن مەدیایێن نێزیکی پارتیا وەکھەڤی و دەمۆکراسیا گەلان (دەم پارتی)، بریارە کو سەرۆککۆمارێ ترکیەیێ رەجەب تەییب ئەردۆگان سبە رۆژا پێنجشەمبێ، 29ێ جۆتمەھا 2025ێ، لگەل پارلامەنتەرێن دەم پارتیێ و ئەندامێن شاندا ئیمرالیێ پەروین بولدان و میتحەت سانجار بجڤە.
ئەڤ جڤین، کو دێ ھەڤدیتنا سێیێ یا د ناڤبەرا ھەردو ئالیان دە بە، وەکی پێشڤەچوونەکا نوو و گرینگ د پێڤاژۆیا ئاشتیێ دە تێ حەسباندن. بریارە کو قۆناغێن داویێ یێن پێڤاژۆیا ئاشتیێ و پێنگاڤێن قانوونی یێن تێکلداری وێ پێڤاژۆیێ بێن نیقاشکرن.
ئەڤ ژی د دەمەکێ دەیە کو، پەکەکێ د رۆژێن بۆری دە د مەراسیمەکا دیرۆکی دە پێنگاڤەک ئاڤێت و ھەمی ھێزێن خوە ژ ئاخا ترکیەیێ ڤەکشاندن. ئەڤ یەک ژی وەکی پێنگاڤەک ژ بۆ پێشڤەچوونا پێڤاژۆیا ئاشتیێ تێ دیتن.
ئەردۆگان ل سەر وێ جڤینێ گۆت کو، ئەو دێ لگەل شاندا دەم پارتیێ ل سەر پێشکەتنێن داویێ یێن گرێدایی وێ پێڤاژۆیێ باخڤن.
کۆمیسیۆنا ئاشتیێ لگەل وەزیرێن داد و دەرڤە دجڤە
د چارچۆڤەیا بزاڤێن ژ بۆ پێشڤەچوونا ئاشتیێ دە، کۆمیسیۆنا تایبەت یا پارلامەنتۆیا ترکیەیێ دێ سبە پێشوازیا وەزیرێ دەرڤە ھاکان فیدان و وەزیرێ دادێ یلماز تونچ بکە. ئارمانجا وێ جڤینێ نیقاشکرنا پێنگاڤێن پێدڤی یێن قانوونی و دیپلۆماتیک ژ بۆ قۆناغا نوویا وێ پێڤاژۆیێ یە.
ل گۆری ھایداریان، کۆمیسیۆنا لھەڤکرنا نیشتیمانی، براتی و دەمۆکراسیێ، کو د پارلامەنتۆیێ دە ب تایبەتی ژ بۆ پێڤەژۆیا ئاشتیێ ھاتیە دامەزراندن، دێ سبە رۆژا پێنجشەمب، 30 جۆتمەھا 2025ێ، جڤینا خوە یا 16ێ بکە.
د پارا یەکێ یا وێ جڤینێ دە، مێڤانداریا وەزیرێ دەرڤە ھاکان فیدان تێ کرن، کو تێ پایین ئەو ئالیێ دیپلۆماتیک یێ پێڤاژۆیێ ژ بۆ ئەندامێن کۆمیسیۆنێ شرۆڤە بکە. د پارا دویێ دە ژی، وەزیرێ دادێ یلماز تونچ دێ تەڤلی وێ ببە و دێ ھوورگلیێن پێنگاڤێن قانوونی یێن پێدڤی بخە رۆژەڤێ.
ھەردو وەزیر دێ نێرینێن وەزارەتێن خوە یێن گرێدایی قۆناغێن ھەری داویێ یێن وێ پێڤاژۆیێ پێشکێش بکن و پشترە دێ بەرسڤا پرسێن ئەندامێن کۆمیسیۆنێ بدن.
وەزیرێ دادێ یلماز تونچ د دەرحەقا جڤینێ دە راگھاندبوو: “پێنگاڤەکا بەرچاڤ دێ ژ ئالیێ کۆمیسیۆنا پارلامەنتۆیێ ڤە بێ ئاڤێتن و ئەو وەکی وەزارەتا دادێ دێ د جڤینێ دە پێنگاڤێن قانوونی یێن پێدڤی یێن گرێدایی وێ پێڤاژۆیێ نیقاش بکن.”
