ما گه‌ریلا ل باكور هه‌نه ژ بۆ كو بریارا ڤه‌كشینا وان وه‌ره دایین؟
رێخستنا په‌كه‌كێ د 25 جۆتمه‌هێ ده راگهاند، ئه‌و دێ ته‌ڤ هێزێن خوه یێن ل تركیه‌یێ ڤه‌كشینه باشوورێ كوردستانێ، ئه‌ڤ یێك د ده‌مه‌كێ ده یه كو رێخستنێ چ هێزێن ووسا ل تركیه‌یێ نینن و تشتا هه‌یی ته‌نێ هنه‌ك یه‌كینه‌یێن 3 كه‌سی یێن گه‌ریلا نه و ت چالاكییان ئه‌نجام نادن.
وه‌زیرێ ناڤخوه یێ تركیه‌یێ یێ به‌رێ سوله‌یمان سۆیلو ل رۆژا 9 ئادارا 2021ێ راگهاندبوو، ھەژمارا چه‌كدارێن په‌كه‌كێ ل تركیێ 83% داكه‌تییه، ئه‌ڤ ژی ب وێ واتایێ تێ كو رێخستنێ باشوورێ كوردستانێ كرییه مه‌یدانا شه‌ر.
سوله‌یمان سۆیلو گۆتبوو: “رێخستنا په‌كه‌كێ ته‌نێ دوورێن 300 چه‌كداران د تركیێ دا مانه”.
ئه‌ڤ ئامار نه ته‌نێ ژ هێلا تركیێ ڤه هاتییه پارڤه‌كرن، لێ به‌لێ ناڤەندا ALCED یا ئه‌مه‌ریكی كو سازییه‌كا نه‌حكوومی یا تایبه‌ته ب به‌لاڤ كرنا داتایێن شه‌ر و په‌ڤچوونان، ل سالا 2020ێ راپۆره‌ك بەلاڤ کربوو و تێدا ئه‌شكه‌ره كربوو كو شەرێ د نێڤبه‌را ترکیێ و پەکەکێ دا 77%ێ ژێ ل سه‌ر خاکا باشوورێ کوردستانێ یه.
ڤێ سازییا ئه‌مه‌ریكی ئه‌شكه‌ره كربوو په‌كه‌كێ چ چالاكییه‌كا ووسا ل باكوورێ كوردستانێ ئه‌نجام ناده‌ت.
ب ڤه‌كشینا وێ هه‌ژمارا كێم یا گه‌ریلایان چ چێدبه؟
په‌كه‌كێ ژ سالا 2012ێ ڤه ب ئاوایه‌كی سیستماتیك و ب هه‌ماهه‌نگییا تركیه‌یێ، باشوورێ كوردستانێ كربوو مه‌یدانا شه‌ر و په‌ڤچوونێن خوه یێن ساخته و هه‌ر كو دچوو هن هه‌رێمێن نوو دكرن هه‌رێمێن قه‌ده‌غه كری، ئه‌نجام په‌كه‌كه پێتر نێزی گوندان بوو و تركیه‌یێ ژی ب به‌هانه‌یا په‌كه‌كێ پێتر باره‌گه‌هـ و نوقته‌یێن خوه قاهیم كرن.
د پێڤاژۆیا كو د 27 سباتا ئیسال 2025ێ ب بانگا ئۆجالان یا ل سه‌ر داخوازا باخچه‌لی ده‌ستپێكری، ده‌رئه‌نجامێن وێ ته‌نێ د به‌رژه‌وه‌ندییا تركیه‌یێ ده ده‌ردكه‌ڤن، ژ هلوه‌شاندنا په‌كه‌كێ، چه‌كدانین و پێنگاڤا داوین ژی یا ڤه‌كشینا گه‌ریلایان.
ئۆجالان تركیه ب ته‌رۆر هشت!
ب ڤێ ڤه‌كشینێ ئۆجالان تام به‌ندێن “پرۆژه‌یا ئاشتیێ” یا كو تركیه ناڤێ “تركیه‌یا بێ ته‌رۆر” لێ دكه ب جیهـ كرن، وی تركیه ژ كۆمێن گه‌ریلایان ڤالاكر، دبه كو تركیه ئێدی د ناڤا د ئارامیه‌كا تام ده بمینه، پێشكه‌تنێن وێ یێن گه‌شتوگوزار و ئابوور و چاندنیێ بله‌زتر ب پێش بكه‌ڤن.
لێ ل باشوورێ كوردستانێ كو ئه‌ڤ ده‌هان سالن گه‌لێ وێ چاڤه‌رێیا چوونا په‌كه‌كێ دكر، ڤێ ڤه‌كشینێ ئه‌ڤ هێڤیێن وان دوورتر كرن و ئه‌شكه‌ره بوو كو په‌كه‌كه پلان دكه د گوند و هه‌رێمێن وان ده مایینده بمینه.
گەلۆ هه‌گه‌ر نه ژ به‌رده‌وامییا خزمه‌تكرنا تركیه‌یێ به، ئەڤ ھێزێن چەکدار دێ ل باشوورێ کوردستانێ چ بکن؟
