ھەسەدێ ب پشتەڤانیا ھەڤپەیمانان ئۆپەراسیۆنەکا ئەولەھیێ دا دەستپێکرن

ھێزێن سووریا دەمۆکرات (ھەسەدێ)، ب پشتگریا ھەڤپەیمانیا ناڤدەولەتی، بەربانگا ئیرۆ 1ێ مژدارێ ل باژارێ رەقایێ ل دژی شانەیێن ڤەشارتی یێن داعشێ دەست ب ئۆپەراسیۆنەکا بەرفرەھا ئەولەھیێ کر. ئۆپەراسیۆن د دەمەکێ دە تێ کو د ھەفتەیێن داوی دە ئێریشێن شانەیێن داعشێ ل ھەرێمێ زێدە بوونە.

ناڤەندا راگھاندنێ یا ھەسەدێ د داخویانیەکێ دە راگھاند، ئۆپەراسیۆن ب ئاوایەکی رێکخستی و ب پشتەڤانیا ھێزێن ھەڤپەیمانیا ناڤدەولەتی برێڤە دچە.

ل گۆر داخویانیێ، ئەڤ پێنگاڤ د چارچۆڤەیا “ئەرکا دۆمدار یا شەرێ ل دژی تەرۆرێ ھەتا تونەکرنا وێ یا ب تەمامی” دە تێ ئاڤێتن.

ھەسەدێ دەستنیشان کر کو پشتی بداویبوونا ئۆپەراسیۆنێ و کۆنترۆلکرنا جھێن گومانباران، دێ ئاگاھیێن بەرفرەھتر دەربارێ ئەنجامان دە لگەل رایا گشتی پارڤە بکە.

ئەڤ ئۆپەراسیۆن د دەمەکێ دە تێ کو ل ھەرێمێن باکور و رۆژھلاتێ سووریەیێ ژ دەستپێکا مەھا جۆتمەھێ ڤە چالاکیێن شانەیێن داعشێ ب ئاوایەکی بەربچاڤ زێدە بوونە. ھاتە راگھاندن کو تەنێ د مەھا بۆری دە رێخستنێ 16 ئێریش پێک ئانینە، کو د ئەنجاما وان دە وەلاتیێن سڤیل و ئەندامێن ھێزێن ئەولەھیێ بوونە قوربانی.