ئەنقەرە و ئیمرالی ڤەکێشانا چەکدارێن پەکەکێ نیقاش دکن
حکوومەتا ترکیەیێ ب سەرۆکاتیا ئەردۆگان دجڤە و ڤەکێشانا چەکدارێن پەکەکێ نیقاش دکە. شاندەکا دەم پارتیێ ژی لگەل ئۆجالان دجڤە.
بریارە کو حکوومەتا ترکیەیێ ئیرۆ رۆژا دوشەمب، 3ێ مژدارا 2025ێ، ب سەرۆکاتیا سەرۆککۆمارێ ترکیەیێ رەجەب تەییب ئەردۆگان ل کۆچکا باشتەپەیێ بجڤە.
ئاژانسا تەرەتێ یا نووچەیان ئاماژە دایە کو، د وێ جڤینێ دە رەوشا نھا یا ترکیەیێ و پێنگاڤێن کو د پێڤاژۆیا ئاشتیێ دە ھاتنە ئاڤێتن، ب تایبەتی ژی ڤەکێشانا چەکدارێن پەکەکێ ژ باکورێ کوردستانێ، تێن نیقاشکرن.
ھەر ل گۆری وێ چاڤکانیێ، مژارەکا دن یا وێ جڤینێ ب رەوشا ناڤخوەیی یا سووریەیێ و ھێزێن سووریەیا دەمۆکراتیک (ھەسەدێ) ڤە گرێدایییە.
ل گۆری زانیارێن تەرەتێ، د وێ جڤینێ دە مژارەکا ئابۆری تێ نیقاشکرن، ئەو ژی گرێدایی رێکارێن بەرھنگاربوونا هەلاوسانێ و ئافراندنا دەرفەتێن زێدەتر ژ بۆ وەبەرھێنانێ و سیستەمێن دامەزراندنێ یە. ھەروەسا بریارە کو بەحسا پێشکەتنێن داویێ یێن پێڤاژۆیا کرینا بالافرا Eurofighter ژی بێ کرن.
ل سەر ئاستا دەڤەرێ ژی، حکوومەتا ترکیەیێ د جڤینا خوە دە بەحسا ئاگربەستا غەززەیێ دکە. ژ بلی ئێریشێن بەردەوام یێن ئیسرایلێ ل سەر کەرتێ غەززەیێ، حکوومەتا ترکیەیێ تەکەزێ ل سەر ئاشتیەکا ھەردەمی ژی دکە.
