مەسروور بارزانی: جادەیەکە دن یا دوئالی ڤەکر
سەرۆکێ حکوومەتا ھەرێما کوردستانێ مەسروور بارزانی ئیرۆ رۆژا دوشەمب، 3ێ مژدارا 2025ێ، پرۆژەیا جادەیا دوئالی یا حاجی عۆمەرانێ ڤەکر و د وێ مەراسیمێ دە گۆتارەک پێشکێش کر.
گۆتارا سەرۆکێ حکوومەتا ھەرێما کوردستانێ:
ب ناڤێ خودایێ مەزن و دلۆڤان
ب راستی ئەز گەلەک دلخوەشم کو سەردانا حاجی عۆمەرانێ دکم، کو دەمەکێ پایتەختا شۆرەشا ئیلۆنێ بوو، شوونوارێ بارزانیێ نەمرە، جھێ وان پێشمەرگەیێن قەھرەمانە یێن کو ئەم نھا بەرھەما دەستێن وان دبینن و دەولەت سەرێ زەحمەت و وەستیانا وان پێشمەرگەیێن قەھرەمان نھا مە کوردستانەکا ئازاد ھەیە.
ئەز دلخوەشم کو ئەم ئیرۆ ژ بۆ ڤەکرنا بەشەک ژ ڤێ رێیێ ل ڤێ دەرێ نە، کو ب ئاوایەکی سەردەم و برێکووپێک ھاتیە چێکرن و کەفتیە د خزمەتا ھەمی وەلاتیان دە. بێ گومان خەلکێ ڤێ دەڤەرێ ھەژی خزمەتەکا یەکجار ژ ڤێ زێدەترە. تشتێ کو ژ دەستێ حکوومەتێ ژی بێ، ئەم دێ ل گۆر شیانان د خزمەتا وە دە بن و ئەم دێ ڤێ پێشڤەبرن و پێشخستنا وەلاتێ خوە بەردەوام بکن.
ئەڤ جھەکێ گرینگە ژ بەر کو ئەو ب وەلاتێ جیرانێ مە، کۆمارا ئیسلامی یا ئیرانێ رە ژی دەریەکە، کو دڤێت ئەم گرینگیێ بدن ڤان تێکلیان و ھێسانکاریان ژ بۆ ھاتن و چوونا وەلاتیان بکن، و ژ ئالیێ بازرگانی ژی ڤە ژ بۆ مە گرینگە کو ئەم بازرگانیا لگەل وەلاتێ جیران ژی پێش بخن. ئەز ھێڤی دکم کو ئەڤ رێ و ھەمی کار و خزمەتێن حکوومەتا ھەرێما کوردستانێ جارەکا دن بکەڤن د خزمەتا وەلاتیان و دەبارا خەلکێ کوردستانێ دە، و سلامەتی و سەربلندیا وە ژ بۆ مە ئەرکە و ھێڤیا مەیە.
ئەز ھێڤیدارم ھەر ل وە پیرۆز بە، کوردستان رۆژ ب رۆژ سەرکەفتیتر بە، پێشکەتنەکا زێدەتر ببینە، ھوون ھەر ساخ و بسلامەتی بن و وەلاتێ مە ھەر ئاڤەدان بە. گەلەک گەلەک سپاس.
