هەیئەتا ئیمرالیێ ناڤەرۆکا هەڤدیتنا ب ئۆجالان رە ئەشکەرە کر

هەیئەتا ئیمرالیێ یا دەم پارتیێ راگهاند کو وان ل ئیمرالیێ ب رێبەرێ په‌كه‌كێ عه‌بدوللا ئۆجالان رە هەڤدیتنەک “گەلەکی ئەرێنی” پێک ئانیە.

ل گۆری داخویانیێ، ئۆجالان گۆتیە، «پێوەندیا ترک و کوردان وەکی دو ستوونێن هەزار سالی یە» و دڤێ «دیاردەیا کوردان ب هەموو ئالیێن خوە ڤە تەڤلی یاساییبوونا کۆمارێ ببە».

هەیەتا ئیمرالیێ یا دەم پارتیێ ئیرۆ 4ێ چریا پاشین یا 2025ان داخویانیەک بەلاڤ کر.

د داخویانیێ دە هات گۆتن کو وان دۆهـ 3یێ چریا پاشین ب ئۆجالان رە هەڤدیتنەک پێک ئانیە کو نێزیکی سێ سائەتان ئاژۆتیە.

هەیئەتێ دیار کر کو تەندورستی و مۆرالێ ئۆجالان “گەلەکی باش” بوویە.

داخویانیا هەیئەتا ئیمرالیێ وسایە:

“ژ چاپەمەنی و رایا گشتی رە،

د 3یێ چریا پاشینا 2025ان دە مە ل ئیمرالیێ ب برێز عه‌بدوللا ئۆجالان رە هەڤدیتنەکە گەلەکی ئەرێنی پێک ئانی کو نێزیکی سێ سائەتان ئاژۆت.

تەندورستی و مۆرالا وی گەلەکی باش بوو. وی د هەڤدیتنا مە دە ب کورتاسی ئەڤ نرخاندن کرن:

ژ بۆ کو ئەم کاربن ڤێ پێڤاژۆیا کو ئەم تێ دەنە ب پێش بخن، پێویستە کو دیرۆک و سۆسیۆلۆژی زێدەتر جدی بێن وەرگرتن.

گرینگە کو بێ تەسبیتکرن کو پێوەندیا ترک و کوردان وەکی دو ستوونێن هەزار سالی هەتا رۆژا ئیرۆ هاتیە.

پێویستە ب دیتن، فێمکرن و سەرەراستکرنا ڤان ستوونان پێکڤەژیانێ بێ خورتکرن.

دڤێ ئەمنە ب خێزکرنا خەتان، ب ئاڤاکرنا ئاسۆیەکە کو پرسگرێکێن مەیێن رۆژانە ژی ل خوە دگرە تەڤبگەرن.

ئەم د شەرت و مەرجێن سینۆردار دە ژ بۆ پرسگرێکا دیرۆکی هەولەکە جدی ددن. ئەم هەول ددن قۆناغەکە ئەرێنی ب پێش بخن،نە یەکا وێرانکەر و نەیینی.

دڤێ دیاردەیا کورد ب هەموو ئالیێن خوە ڤە تەڤلی یاساییبوونا کۆمارێ ببە و ژ بۆ ڤێ ژی پێڤاژۆیەکە ڤەگوهێزا بهێز ئەساس بێ گرتن.

ڤەگوهاستنا یاساییبوونێ وەکی دیاردەیەکە گشتی دێ بنگەهێن هقووقی یێن کۆمارا دەمۆکراتیک خورتتر بکە.

دەرفەتا ئەنتەگراسیۆنا دەمۆکراتیکا کو ئەم ئیرۆ ل بەر دەریێ وێنە، هەم هەرێمییە و هەم ژی گەردوونییە.

ژ بۆ کو ئەم کاربن دەرباسی قۆناغا ئەرێنی ببن، د ڤێ پێڤاژۆیێ دە ژ بۆ هەر کەسی گرینگیەکە ژیانییە کو ب هەستیاری، جددیەت و ب زانەبوونا بەرپرسیاریێ تەڤبگەرە.»