ژ بۆ بەردانا دەمیرتاش رۆژێن ب هەژمار مانە

نڤیسکارێ رۆژنامەیا حوڕیەت عه‌بدولقادر سەلڤی د نڤیسا خوە یا ئیرۆ دە ئیدیعا کر کو ژ بۆ بەردانا دەمیرتاش رۆژێن ب هەژمار مانە و ئەردۆگان د ڤێ مژارێ دە هەلوەستەکە ئەرێنی نیشان دایە.

نڤیسکارێ رۆژنامەیا حوڕیەت عه‌بدولقادر سەلڤی یێ کو ب نێزیکبوونا خوە یا ب دەستهلاتێ رە تێ ناسکرن، د نڤیسا خوە یا ئیرۆ دە دەربارێ بەردانا هەڤسەرۆکێ بەرێ یێ هه‌ده‌پێ سه‌لاحه‌ددین دەمیرتاش ئاگاهی دان.

سەلڤی د نڤیسا خوە دە دیار کر کو سەرۆککۆمارێ ترکیەیێ رەجەپ تایییپ ئەردۆگان د سۆحبەتێن بەریا جڤینا کۆما پارتیا خوە یا ل پارلامەنتۆیێ دە، ل هەمبەری بەردانا دەمیرتاش نێزیکاتیەکە ئەرێنی نیشان دایە.

سەلڤی وها گۆت، «دەما کو سەرۆککۆمار ئەردۆگان بەشداری جڤینا کۆما پارتیا خوە بوو ئەز ل سەر مژارا دەمیرتاش ب کەسەکی گرینگ رە ئاخڤیم. دەما کو ئاگاهی دا من کو دێ ئەردۆگان داخویانیەکە ئەرێنی بدە، من بالا خوە دا مژارێ.

پشتی جڤینێ پرسا دەمیرتاش ژ ئەردۆگان هات کرن. وی گۆت، ئەڤ وەلات وەلاتێ دادوەریێ یە، دادوەری چ ببێژە ئەم دێ ل گۆری وێ تەڤبگەرن.

سەلڤی هەر وها گۆتنێن سەرۆکێ گشتییێ مه‌هه‌پێ دەڤلەت باخچەلی یێن کو گۆتبوو، “بەردانا سه‌لاحه‌ددین دەمیرتاش دێ ببە وەسیلەیا خێران” ب بیر ئانین و گۆت، “ئێدی رێیا دەمیرتاش خویا کر.”

سەلڤی، د نڤیسا خوە دە دیار کر کو د ناڤ دەستهلاتێ دە ئامادەهیێن «پاکێتەکە ئازادیێ» هەنە و وها پێ دە چوو: “د ناڤ ئاک پارتیێ دە کەسێن کو دبێژن کا ئەم رووپەلەکە نوو ڤەکن. ئەم تەنێ ب دەمیرتاش نەمینن. ئەم رێیا بەردانێ ژ بۆ ناڤێن وەکی ئۆسمان کاڤالا یێن کو د جڤاکێ دە ل بەندا وانن ژی ڤەکن هەنە.

نێرینا ب ڤی ئاوایی ئەم ئاتمۆسفەرەکە ئازادیخواز پێک بینن تێ گۆتن.”