سۆزدار ئاڤێستا: مە گاڤێن دیرۆکی ئاڤێتن، لێ ئازادیا ئۆجالان شەرتێ سەرەکییە
ئەنداما کۆنسەیا سەرۆکاتیا کەجەکێ سۆزدار ئاڤێستا راگھاند، وان د چارچۆڤەیا پرۆسەسا ئاشتیێ دە ب ڤەکشاندنا گەریلایان “پێنگاڤێن دیرۆکی” ئاڤێتنە، لێ ترکیە ھەمبەری ڤێ یەکێ بێبەرسڤ مایە. ئاڤێستا تەکەز کر کو ئازادیا فیزیکی یا رێبەرێ پەکەکێ عەبدوللاھ ئۆجالان “مژارا ئەساسی” و شەرتێ سەرکەفتنا پرۆسەسێیە.
ئەنداما کۆنسەیا سەرۆکاتیا کەجەکێ سۆزدار ئاڤێستا د بەشداریا بەرنامەیەکا تەلەڤیزیۆنی دە، پێنگاڤێن داوی یێن د پرۆسەسا ئاشتیێ دە نرخاندن. ئاڤێستا ئانی زمان کو وان ل سەر داخوازا عەبدوللاھ ئۆجالان و ژ بۆ پێشیگرتنا ل ئاژاوەیێن کو دکارن پرۆسەسێ تێک ببن، ھێزێن خوەیێن گەریلا ژ ھندەک دەڤەرێن باکورێ کوردستانێ ڤەکشاندنە. ھەروھا ئاڤێستا ئەڤ گاڤ وەکە “پێنگاڤەکا دیرۆکی یا فەداکارانە” ب ناڤ کر و گۆت کو وان ب بەرپرسیاری ئەرکێن خوە ب جھ ئانینە.
لێ بەلێ، ئاڤێستا رەخنە ل دەولەتا ترک گرت کو ھەتا نھا ت گاڤێن بەربچاڤ نەهاڤێتنە و گۆت: “دڤیابوو دەولەتێ ژ بۆ ئەنتەگراسیۆنەکا دەمۆکراتیک قانوون دەرخستبان و پرسگرێکا کورد د چارچۆڤەیەکا یاسایی دە پێناسە کربا.”
سۆزدار ئاڤێستا تەکەز کر، رۆژەڤا وان یا سەرەکی ئازادیا فیزیکی یا عەبدوللاھ ئۆجالانە و ئەڤ یەک وەکە شەرتێ بنگەھین یێ سەرکەفتنا ھەر پێڤاژۆیەکێ دەستنیشان کر. ھەروھا گۆت: “وەکە تەڤگەرا ئازادیێ رۆژەڤا مە یا سەرەکی ئازادیا فیزیکی یا رێبەر ئاپۆیە. ھەیا کو ئازادیا فیزیکی یا رێبەر ئاپۆ مسۆگەر نەبە، ت پێڤاژۆ ب سەر ناکەڤە.”
ئاڤێستا دا زانین کو دەرفەتێن ژ ئۆجالان رە ھاتنە دایین “پر بچووکن” و گۆت کو پێکانینا “مافێ ھێڤیێ” و مسۆگەرکرنا شەرت و مەرجێن وی یێن یاسایی ژ بۆ پێشکەتنا پرۆسەسێ گرینگیەکا ژیانی ھەیە.
دەربارێ رۆژئاڤایێ کوردستانێ و ھێزێن سووریا دەمۆکراتیک (ھەسەدێ) دە، سۆزدار ئاڤێستا داخویانیێن رایەدارێن ترک ب توندی رەد کرن. وێ گۆتەگۆتێن کو دبێژن ئەندامێن پەکەکێ پشتی ڤەکشینێ تەڤلی رەفێن ھەسەدێ بوونە وەکە “دەرەو” ب ناڤ کر و گۆت: “یەک ئەندامێ پەکەکێ ژی دەرباسی رۆژئاڤایێ کوردستانێ نەبوویە و تەڤلی ھەسەدێ نەبوویە و گۆت کو ئارمانجا ڤان گۆتنان تێکبرنا چارەسەریێ یە.
د ھەمان چارچۆڤەیێ دە، ئاڤێستا سەردانا وەزیرێ دەرڤەیێ ترکیەیێ ھاکان فیدان یا ژ بۆ ئیراقێ و داخویانیێن وی وەکە پرۆڤۆکاسیۆن ل دژی پرۆسەیا ئاشتیێ نرخاند. ئاڤێستا گۆت، داخوازا فیدان یا کو “بلا پەکەکە ژ سووریێ، ئیران و ئیراقێ ژی دەرکەڤە” د راستیێ دە نە تەنێ ل دژی پەکەکێ یە، لێ تێ واتەیا “بلا کورد دەرکەڤن”. وێ ئەڤ زیھنیەت وەکە ئاستەنگیا ھەری مەزن یا ل پێشیا ئاشتی و دەمۆکراسیێ ل ھەرێمێ ب ناڤ کر.
ئاڤێستا دەستنیشان کر کو دڤێت ترکیە ل شوونا کو پرسا ھەسەدێ بکە ھنجەت، ژ ھەرێمێن کو ل سووریە و ئیراقێ داگیر کرنە ڤەکشە.
