خوەجھیا عەفرینێ یا ئەنەکسێ کوشتنا دو وەلاتیێن کورد شەرمەزار کر

ئەنجوومەنا خوەجھی یا ئەنجوومەنا نشتمانی یا کوردی (ئەنەکەسێ) ل عەفرینێ، ب داخویانیەکێ کوشتنا دو وەلاتیێن سڤیل یێن کورد ب توندی شەرمەزار کر و رەوشا ئەولەھیێ یا ھەرێمێ وەکە ‘مەترسیدار’ ب ناڤ کر. ئەنەکەسێ داخواز کر کو چەکدار ژ ناڤ گوند و باژاران بێن دەرخستن و سینۆرەک ژ بۆ تاوانێن ل دژی سڤیلان وەرە دانین.

ئەنجوومەنا خوەجھی یا ئەنەکەسێ ل عەفرینێ، دوھ 7ێ مژدارێ داخویانیەک بەلاڤ کر و تێ دە کوشتنا وەلاتیێن ب ناڤێ شوکری ئەحمەد ئۆسۆ و محەمەد عەبدۆ دەرویش د دو رۆژێن بۆری دە شەرمەزار کر.

ل گۆری داخویانیێ، تاوانا یەکەم ئێڤارا 5ێ مژدارێ، ل گوندێ کەفەرزیتێ پێک ھات. د بوویەرێ دە، وەلاتیێ ب ناڤێ شوکری ئەحمەد ئۆسۆیێ 70 سالی، دەما کو ب تراکتۆرێ ژ گوڤاشخانەیا زەیتوونان ڤەدگەریا گوند، راستی ئێریشەکا چەکداری ھات و د جھ دە ژیانا خوە ژ دەست دا.

تاوانا دویەم ژی ئێڤارا 6ێ مژدارێ ل دەشتا غەزاویێ قەومی. وەلاتیێ ب ناڤێ محەمەد عەبدۆ دەرویشێ 57 سالی و خەلکێ گوندێ برج عەبدالۆ، ژ ئالیێ کەسێن چەکدارێن رووپۆشکری ڤە ل بەر چاڤێن ھەڤژینا وی د ناڤا خیڤەتا وی دە ھات کوشتن.

“بلا چەکدار ژ گوند و باژاران وەرن دەرخستن”

خوەجھیا ئەنەکەسێ د داخویانیا خوە دە بال کشاند سەر رەوشا ئەولەھیێ یا خراب یا ل عەفرینێ (چیایێ کورمێنج) و دیار کر کو بەلاڤبوونا چەکێن بێکۆنترۆل، ھەبوونا چەکداران د ناڤا گوند و باژاران دە و نەبوونا دەوریەیێن ئەولەھیێ، بوونە سەدەما زێدەبوونا تاوان و بنپێکرنان.

ل سەر ڤێ یەکێ، ئەنەکەسێ بانگ ل ئالیێن بەرپرسیار کر کو

– سینۆرەکێ ژ بۆ ڤان تاوان و بنپێکرنان دەینن.

– تاوانباران بگرن و وان رادەستی دادگەھان بکن.

– ئاشتیا جڤاکی بپارێزن و چەکداران ژ ناڤەندێن سڤیلان دەرخینن و وان ڤەگەرینن بارەگەھێن لەشکەری.

– کۆنترۆلا چەکێن بێسەرووبەر بکن و ئەولەھیێ ل ھەرێمێ مسۆگەر بکن، دا کو وەلاتی د ئارامیێ دە بژین.

خوەجھیا عەفرینێ داخویانیا خوە ب شەرمەزارکرنا کوژەر و تاوانباران بداوی ئانی.