ھاتیمۆغلاری: دڤێت دەمیرتاش بهێت بەردان و کۆمیسیۆن لگەل ئۆجالان ھەڤدیتنێ بکە

ھەڤسەرۆکا پارتیا وەکھەڤی و دەمۆکراسیێ یا گەلان (دەم پارتی) تولای ھاتیمۆغلاری راگھاند، ترکیە نەچارە سەلاحەدین دەمیرتاش و فیگەن یوکسەکداگ ئازاد بکە. ھاتیمۆغلاری ھەروھا تەکەز کر کو ئەگەر کۆمیسیۆنا پرۆسەیا ئاشتیێ لگەل ئۆجالان ھەڤدیتنێ نەکە، پرۆسە ب سەر ناکەڤە و پێش دە ناچە.

ھەڤسەرۆکا دەم پارتیێ تولای ھاتیمۆغلاری ئیرۆ 8ێ مژدارێ د ئاخافتنا خوە یا ژ بۆ ئاژانسا “مەزۆپۆتامیایێ” دە، بال کشاند سەر بریارا دادگەھا مافێن مرۆڤان یا ئەورۆپایێ (DMME) و گۆت: “دادگەھا مافێن مرۆڤان یا ئەورۆپایێ جارا سێیەمە بریارا ئازادکرنا سەلاحەدین دەمیرتاش ددە، لێ ئەڤ بریار ھین ژی نەھاتیە جیبجیکرن.”

وێ دەستنیشان کر، دڤیابوو ھەتا نھا نە تەنێ دەمیرتاش و فیگەن یوکسەکداگ، لێ ھەموو گرتیێن دۆزا کۆبانێ ھاتبانا ئازادکرن. ھەڤسەرۆکا دەم پارتیێ ھەروھا ئانی زمان کو ل گرتیگەھێن ترکیەیێ کەسێن 32-33 سالن د زندانێ دە نە ھەنە، لێ ب ھنجەتێن جودا نایێن بەردان.

“بێیی ھەڤدیتنا لگەل ئۆجالان، پرۆسە بپێش ناکەڤە”

دەربارێ پرۆسەیا ئاشتیێ و رۆلا ئۆجالان دە، ھاتیمۆغلاری گۆت، ئەگەرا ھەڤدیتنا کۆمیسیۆنا پرۆسەیا ئاشتیێ لگەل ئۆجالان زێدە بوویە و ئەڤ یەک ژ بۆ سەرکەفتنا پرۆسەیێ شەرتەکی بنگەھینە.

ھاتیمۆغلاری وھا ئاخڤی: “برێز ئۆجالان د ئانینا پرۆسەیێ ھەتا ڤێ قۆناغێ دە رۆلەک پر گرینگ و ئەرکەک مەزن گرتیە سەر خوە. ئەو لیدەرەکە کو گەلان د چارەسەریا پرسگرێکا کورد دە وەکە ئاکتۆرێ سەرەکی دبینن. ھەر کەس دزانە کو بێیی ھەڤدیتنا لگەل وی، د ڤێ پرۆسەیێ دە پێشڤەچوون چێنابە. ژ بەر ڤێ یەکێ، رێخستنا وی، گەلێن ترک و کورد و ھێزێن دەمۆکراسیێ داخوازا ڤێ ھەڤدیتنێ دکن. ئەم باوەر دکن کو ئەگەر ھەڤدیتن پێک وەرە، برێز ئۆجالان دێ تەڤکاریێن گەلەک گرینگ پێشکێشی ڤێ پرۆسەسێ بکە.”