نومان کورتولموش: ھاتنا ئۆجالان بۆ پارلامەنتۆیێ د رۆژەڤا مە دە نینە
نومان کورتولموش دیار کر کو گەر لھەڤکرنەک چێببە، ھەڤدیتنەک لگەل ئۆجالان دکارە وەرە کرن و گۆت، “د رۆژەڤا مە دە نە ئۆجالان د پارلامەنتۆیێ دە و نە ژی سەرۆکاتیا کۆما دەمێ ھەیە.”
سەرۆکێ پارلامەنتۆیا ترکیەیێ نومان کورتولموش ل قەسرا ئاتاتورک یا گرێدایی مەجلیسا نەتەوەیی یا مەزن یا ترکیەیێ ل ستەنبۆلێ لگەل بەرپرسێن چاپەمەنیێ جڤیا.
کورتولموش د بەرسڤا پرسێن رۆژنامەڤانانان یێن ل سەر رەوشا ھەیی دە دەربارێ ھەڤدیتنا کۆمیسیۆنا ھەڤگرتنا نەتەوەیی، براتی و دەمۆکراسیێ یا لگەل ئۆجالان وھا گۆت:
“مەسەلەیا شاندنا شاندەیەکێ بۆ ئیمرالیێ د دەمێن بەرێ دە ھاتیە رابەرکرن. ئەڤە پراکتیکەک چاڤەرێکری یە د چارچۆڤەیا قانوونی یا ھەیی یا ترکیەیێ دە. گەر پارلامەنتۆ و پارتیێن سیاسی ل سەر ڤێ مژارێ ل ھەڤ بکن، ھەڤدیتنەک وسا دکارە د چارچۆڤەیا قانوونی دە وەرە کرن. ئیمرالی سازیەک سزا و سێدارەدانێ یە. ئەندامێن پارلامەنتۆیێ بەرێ ل ور ھەڤدیتن کرنە. ئەڤ رەوشەک نەئاسایی نینە؛ ئەو بەشەک خوەزایی یا سیستەما قانوونییە.”
رۆژنامەڤانەکی ژ کورتولمو پرسی: “گەلۆ موومکنە کو ئۆجالان سەردانا پارلامەنتۆیێ ئان یا کۆما دەمێ بکە؟” وی بەرسڤ دا، “نا، ئەڤ ب تەڤاھی نە د رۆژەڤا مە دەیە. مژارەکە وسا نە د رۆژەڤا پارلامەنتۆیێ و نە ژی د رۆژەڤا کۆمیسیۆنێ دەیە.”
“ژ بۆ ھندەک دەردۆران، نەرەحەتبوونا ب زمانێ کوردی رامانەک خەلەتە.”
کورتولموش گۆت، “دەولەتێ چ پرسگرێکەک لگەل گەلێ کورد نینە؛ ئەم ھەمی وەلاتیێن وەکھەڤ و ئازادین. مافێ ھەری خوەزایی یێ مرۆڤانە کو چاند و زمانێ خوە بپارێزن. زمانێ دایکێ وەکی شیرێ دایکێ حەلالە؛ لێ جوداخوازیا ل سەر بنگەھا زمانێ دایکێ قەدەغەیە. زمانێ فەرمی یێ ترکیەیێ ترکییە، لێ ھەر چاند دکارە خوە ب ئازادی ئیفادە بکە. ھەڤۆکەک ژ ئاخافتنا من یا ب کوردی ل سەر مالپەرا پارلامەنتۆیێ ھاتە وەشاندن. ژ بۆ ھندەک دەردۆران، کو ژ وەشانێن ب ئینگلیزی، فرانسی، ئان ئەلمانی عاجز نابن، رامانەک خەلەتە کو ژ زمانێ کوردی نەرەحەت ببن.”
