ره‌یان كلدانی راگه‌هاندكارێن مووسلێ ئه‌ركدار كرنه ئێریش كوردان و په‌ده‌كێ بكن
ره‌یان كلدانی رێبه‌رێ ته‌ڤگه‌را «بابلیۆن» كو ته‌ڤگه‌ره‌كه سیاسی و چه‌كداری یا د چارچووڤه‌یا حه‌شدا شه‌عبی ده یه، هه‌ژماره‌كه مه‌دیاكارێن مووسلێ ئه‌ركدار كرنه كو ئێریشی كوردان و په‌ده‌كێ بكن و گۆتارا كین و نه‌فره‌تێ به‌لاڤ بكن.
چاڤكانیێن داركا مازی ئاشكه‌ره كرن كو ژ ده‌ستپێكا بانگه‌شیا هلبژارتنا پارلمه‌نتۆیا ئیراقێ، ب فه‌رمان و راسپارده‌یا ره‌یان كلدانی، ئێریش ل سه‌ر په‌ده‌كێ و كوردان ل مووسلێ و ده‌شتا نه‌ینه‌وایێ تێ كرن، هه‌ری داوی كلدانی په‌نا بۆ مه‌دیاكاران بریه و ب رییا وان ئه‌ڤان ئێریشێن خوه ده‌وام دكه.
چاڤكانیێن مه ده‌ستنیشان كرن، یێك ژ مه‌دیاكارێن كو ره‌یان كلدانی كوژمێ 25 ملیۆن دینارا په‌ره و ئۆتۆمۆبیله‌ك پێ دای، مه‌دیاكارا ب ناڤێ «زوحا وه‌لید ئه‌لزوبه‌یدی» یه، ئه‌ڤ كۆژمه وه‌كه به‌ده‌ل پێش ئێریش و گۆتارێن وێ یێن نه‌فره‌تی ل سه‌ر كوردان و تایبه‌ت په‌ده‌كێ هاتییه دایین.
ل گۆری ئاگاهیێن مه، مه‌دیاكارا ب ناڤێ زوحا، ناڤێ وێ یێ راستین، «زوحا وه‌لید عه‌لی ئه‌لجحێشی» یه، عه‌ره‌به و ژ شێنیێن ئالێ چه‌پێ یێ مووسلێ یه، ئه‌و وه‌كه راگهاندكار ب ره‌یان كلدانی ره د خه‌بته، هه‌ژماره‌كه رۆپه‌لان ل مه‌دیایا جڤاكی هه‌نه و ب رییا وان ئێریشی كوردان، رێبه‌رێ كوردان سه‌رۆك بارزانی و په‌ده‌كێ دكه.
چاڤكانیێن مه ئاشكه‌ره كرن كو ئه‌ڤ كه‌سا ب ناڤێ زوحا وه‌لید ئه‌لزوبه‌یدی د حه‌سابا خوه یا كه‌سی ده ژی ب راسپارده‌یا كه‌سێن ب ناڤێن «مه‌روان تائی، عومه‌ر ئه‌ل مه‌ولا» و هه‌روه‌ها ره‌یان كلدانی ره‌خنه‌یێن بێ بنگه‌هـ ل په‌ده‌كێ دگره.
هه‌روه‌ها ئاشكه‌ره كرن، رووپه‌له‌كه دن یا ب ناڤێ «مملكه نینوی» كو ژ هێلا زوحا وه‌لید ئه‌لزوبه‌یدی ڤه تێ برێڤه‌برن، ئێریشێن هه‌ری توند ل سه‌ر كوردان، په‌ده‌كێ، هێزێن ئاساییش و پارتیێن كوردستانی دكه ژ شێنیێن مووسلێ دخوازه كو ده‌نگی ب كوردان و پارتیێن كوردستانی نه‌دن.
چاڤكانیێن داركا مازی، ئاشكه‌ره كر كو ره‌یان كلدانی ژ بۆی ڤێ كارێ وێ، كوژمێ 25 ملیۆن دینار و ئۆتۆمۆبیله‌ك ب زوحا وه‌لید ئه‌لزوبه‌یدی دایه.
هێژای گۆتنێ یه، برایێ زوحا وه‌لید ئه‌لزوبه‌یدی، یێك ژ چه‌كدارێن داعشێ بوو ل زومار و شه‌نگالێ، ل دژی پێشمه‌رگه‌ی شه‌ر كری یه، پشتره ژ هێلا حكوومه‌تا ئیراقێ ڤه هاتیه ده‌سته‌سه‌ر كرن و ب ئالیكارییا ره‌یان كلدانی سه‌ربه‌ست هات به‌ردان و نها بۆ به‌رژه‌وه‌ندییا كلدانی دخه‌بته.
باڤێ زوحایێ، وه‌لید ئه‌لزوبه‌یدی ژی ب یێك ژ رێبه‌رێن ته‌ڤگه‌را نه‌قشه‌به‌ندی تێ حه‌ساب كرن، نها وه‌كه چاڤكانی و ئاژان بۆ «ئیستخباراتا حه‌شدا شه‌عبی» د خه‌بته، هه‌موه‌خت تێكلیێن وی ب «حارس ئه‌ل به‌یاتی» به‌رپرسێ ئۆفیسا ته‌ڤگه‌را نوجه‌با یا ل مووسلێ ژی هه‌نه.
