میرێ ئێزدیان: ژ بۆ ڤەگەرا ب سەربلندی بۆ شنگالێ، دەنگێ خوە بدن

میر حازم ته‌حسین بەگ بانگ ل جڤاکا ئێزدی کر کو ب ئاوایەکی چالاک بەشداری هلبژارتنان ببن دا کو مافێن خوە ب دەست بخن و نوونەرێن کو پاراستنا ئاخ و نشتیمانێ وان دکن، هلبژێرن.

میرێ ئێزدیان، میر حازم ته‌حسین بەگ پشتی کو ئیرۆ 11ێ مژدارێ ل شێخانێ دەنگێ خوە دا راگهاند، جینۆسایدا ل دژی گەلێ ئێزدی هین ژی بەردەوامە و بانگ ل جڤاکا ئێزدی کر کو ب ئاوایەکی چالاک بەشداری هلبژارتنان ببن دا کو ڤەگەرا ب روومەتا ژ بۆ شنگالێ مسۆگەر بکن.

میر حازم ته‌حسین بەگ د ئاخافتنا خوە یا ژ بۆ رۆژنامەڤانان دە گۆت: “ئیرۆ رۆژەکە گرینگ و دیرۆکییە، ژ بەر کو هەتا نها ژی جینۆسایدا ل دژی جڤاکا ئێزدی بەردەوامە و خەلکێ ئێزدی هین ژی د کامپان دە و د بن کۆنان دە دمینن.”

هەروها تەکەز کر کو دڤێ دەنگ ژ وان کەسان رە وەرە دایین کو “ژ بۆ بدەستخستنا مافان شەر دکن و هەول ددن قەرەبوویێ ژ بۆ وەلاتیان مسۆگەر بکن و خزمەتگوزاریێ بگهینن شنگالێ، دا کو وەلاتی ب سەربلندی ڤەگەرن شنگالێ.”

میرێ ئێزدیان هەروها بال کشاند سەر گرینگیا بەشداریا چالاکا وەلاتیێن ل سینۆرێ بازنەیا نەینەوایێ دا کو مافێن وان وەرن ڤەگەراندن.

میر حازم پەیامەکە تایبەت ئاراستەیی جڤاکا ئێزدی کر و گۆت: “ئیرۆ هوون هەموو بچن ناڤەندێن دەنگدانێ. وەکە کو سەرۆک بارزانی گۆتیە، دەنگێ خوە بدن وان کەسێن کو هوون ب خوە دخوازن و دەنگێ خوە بدن وان کەسێن کو بەرەڤانی و پاراستنا مافێن وەلاتیێن ئێزدی، ئاخ و نشتیمان دکن.”

ل پارێزگەها نەینەوایێ، ژ 34 کورسیێن گشتی، کورسەیەک ژ بۆ پێکهاتەیا ئێزدیان، کورسەیەک ژ بۆ مەسیحیان و کورسەیەک ژ  بۆ شەبەک وەکە کۆتا هەنە. هەژمارا گشتی یا دەنگدێران ل بازنەیا نەینەوایێ 1،969،179 کەسە، کو ل 873 ناڤەند و 3،861 وێستگەهێن دەنگدانێ مافێ وانێ دەنگدانێ هەیە، دا کو نوونەرێن خوە ژ بۆ خولا شەشەما پارلامەنتۆیا ئراقێ هلبژێرن.